Әлжаппар Мұсаев

‘’’Әлжаппар Мұсаев’’’ (15.12.1920 ж. т., Жамбыл облысы, Шу ауданы Бөлтірік ауылы) – соғыс және еңбек ардагері. Горький қаласындағы зениттік артиллерия училищесін бітірген (1942). 1940 ж. Қызыл Армия қатарына алынып, 1941 – 45 ж. 2-дүниежүзілік соғысқа қатысқан. Сталинград шайқастарына, Орловск – Курск соғыстарына араласып, Тула қаласын жаудан қорғайды. 1946 ж. бейбіт өмірге оралғаннан кейін, құрылыс мекемелерінде жұмыс істейді, қысқаша экон. курстарда оқып, ұзақ жылдар бойы аудан, облыс көлемінде банк қызметінде істейді. Промбанкте, а. ш. банкісінде, мемл. банкте істеген үлгілі қызметі үшін «Мемлекеттік банктің үздігі» атағына ие болады. Мұсаев спортпен айналысуды өмірлік мақсат тұтып келеді. 1991 ж. тоғыз құмалақ ойыны бойынша республика чемпионы атанды. 1992 ж. 42 км 100 м қашықтық жүгіруден болған респ. біріншілікте бірінші орынды иеленді. Қазақстанның спорт шебері. Жазушы Т.Айтбайұлының «Мың бір күн, мың бір түн» (2000) атты кітабының басты кейіпкері, «Қазақ жерінің зиялы азаматтары» (авт. Оралбаев Ж., 2001 ж. «Дәуір») кітабына енген. Отан соғысы орденімен 2 рет, медальдармен марапатталған. Шу ауданының құрметті азаматы. 2001 ж. жас ұрпақты жауынгер және дәстүрлі еңбек рухында тәрбиелеуге қосқан зор үлесі үшін Қазақстан Республикасы Президентінің алғысына ие болған.