«Өлімнен де күшті» мемориалы

«Өлімнен де күшті» мемориалы – Абай облысының жергілікті маңызы бар тарих және мәдениет ескерткіштерінің тізіміне, Қазақстанның жалпыұлттық қасиетті нысандар тізбесіне енген, киелі нысан.

«Өлімнен де күшті» мемориалы

Орналасуы	Семей қаласы
Жоба авторы	Ш. Ы. Уәлиханов
Түрі	монументтік өнер құрылысы
Құрылыс материалы	монолит, гранит, болат, ақ мәрмәр

Орналасқан жері

Мемориал қазақша аты Түйемойнақ деп аталатын, Семей қаласының табиғаты ең әдемі бөлігі – Бейбітшілік (Полковничий) аралында орналасқан. Арал Ертіс өзені мен оның сағасы – Семипалатинка өзені арасында.

Кезеңі және авторы

Мемориал 2001 жылы тұрғызылған, авторы – Ш. Ы. Уәлиханов.

Сипаты

Мемориал аумағына оңтүстік батыс бөлігінен кіреді. Кіреберісті халық нанымы бойынша зұлым күштерден қорғап тұратын қанатты барыстар қарауылдап тұрады. Ме- мориалдың негізгі бөлігі төбесі дөңгеленіп келген, атомдық саңырауқұлақтың силуэты ойылған 25 м-лік жалпақ стела болып табылады. Стела жиналмалы монолитті темірбетоннан жасалған, гранит блоктар мен қара гранит тақтайшалармен айналдыра қапталған. Ол айналасында шолу алаңы бар тұғырға қойылған. Стела орталығында ядролық жарылысты бейнелейтін болаттан жасалған 0,5-2 м аралығындағы қырлы сәулелері бар шар мүсінді композиция орнатылған. Стеланың төменгі жағында баласын жауып отырған ананың мүсінін көруге болады. Бұл мүсін ақ мәрмәрден жасалған. Ана кейпі жер-ананың бейнесін суреттейді. Қасында гранит тақтада Кеңестік заманда болған барлық ядролық полигондар мен әскери полигондардың орны белгіленген Қазақстан картасы салынған. Стеланың тік жалпақ бетінде қола әріптермен келесі үндеу сөздер жазылған: «Уа, жаратқан ие, біз көрген зұлматты енді ешкімнің басына бере көрме! Қасиетті Жер-Ананың қасіретті азалы үні әлі естіліп тұр!».
Монументке жақын жерде киелі ағаш өсіп тұр, зиярат етіп келушілер ежелгі тәңір діни сеніміне сәйкес қасиетті орынға деген құрмет белгісі ретінде оның бұтақтарына баулар байлап кетеді.