Абай орыс мектебінде

«Абай орыс мектебінде» («Абай в русской школе») - «Мектеп» баспасынан 1968 ж. орыс тілінде жарық көрген. Орыс мектебінің қазақ әдебиеті мұғалімдеріне арналған тәсілдемелік құрал. Авторы - И. М. Орешникова. Кітапта Абайдың өмірі мен шығармаларын орыс мектептерінде оқыту тәжірибесі жинақталған. Автор мектептерде Абай шығармаларын оқытуға сағат аз бөлінетінін ескеріп, оны нақты жоспар бойынша, материалдарды барынша іріктеп, ұтымды пайдалану, кейбір тақырыптарды сабақтан тыс уақытта өту арқылы оқытуға болатынын ортаға салған. Оқушыларды Абайдың өмірбаянымен таныстыруда М. О. Әуезовтың «Абай жолы» эпопеясын пайдалану тәсіліне тоқталады. Абайдың орыс әдебиетімен шығармашылық байланысына, А. С. Пушкин, М. Ю. Лермонтов, И. А. Крылов өлеңдерін қазақша аударудағы үздік тәжірибесіне, ақынның тел шығармаларының құрылысы мен идеялық-көркемдік қасиетін талдап тануға көп көңіл бөлінген. Автор жастарды адамгершілік, имандылық мұраттарға тәрбиелеуде Абай қарасөздерінің маңызы мен ойшыл-ақынның философиялық, этикалық, эстетикалық, тарихи және экономикалық, көзқарастары жөнінде шәкірттерге ұғымды түрде талдау жасайды. Кітапта Абайдың өмірі мен шығармаларына арналған әдеби кеш өткізудің жоспары келтірілген. Көлемі 2,5 баспа табақ, 6 мың дана болып басылған.