Абай шығармаларының текстологиясы жайында

«Абай шығармаларының текстологиясы жайында» - Қазақтың мемлекеттік көркем әдебиет баспасынан 1959 ж. жарық көрген зерттеу еңбек. Авторы - Қ. Мұқаметханов. Абай мұрасын зерттеуші ғалым 1954 ж. ҚазССР ОА-ның баспасынан жарық көрген ақын шығармаларының 2 томдығын тілге тиек ете отырып, бұрынғы - соңғы басылымдардағы текстологиялық өзгерістерге, кемшіліктер мен қателіктерге ғылыми тұрғыдан жан-жақты талдау жасайды. Ғалым өз нұсқасын ұсынғанда құжатты деректерге, қолжазбаларға, бұрынғы басылымдарға, логикалық тұжырымдарға сүйенеді. Ақынның ғақлия сөздерінің Абай жинақтарындағы басылу ретін, Мүрсейіт және Р. Жандыбаев қолжазбаларындағы жазылу ретін салыстырады. Кітап көл. 7, 4 баспа табақ, 1200 дана болып басылған.