Абай Құнанбаевтың философиялық, психологиялық және педогогикалық көзқарастары

«Абай Құнанбаевтың философиялық, психологиялық және педогогикалық көзқарастары» («Философские, психологические и педагогические взгляды Абая Кунанбаева») - Қазақтың мемлекеттік көркем әдебиет баспасынан 1957 ж. орыс тілінде жарық көрген зерттеу еңбек. Авторы - Т. Тәжібаев. Кітап ақынның философиялық, психологиялық және педагогикалық қызметін ашуға байланысты абайтану ғылымында осы уақытқа дейін ақтаңдақ болып келген мәселелерді зерттеуге арналған. Автор Абайдың философиялық көзқарасын бағалауда ғалым Ә. Қоңырбаевтың ағат пікірлерін сынға алады, ол «Абай Құнанбаев шығармашылығындағы психология мәселелерін гносеология мәселелерімен шатастырып алғанын, ақынның психологиялық көзқарасын философ, көзқарасымен араластырып жібергенін» атап көрсетеді. И. М. Сеченев, К. Д. Ушинский, Милль, Спенсердің Абай дүниетанымының қалыптасуына жасаған әсеріне тоқталады. Ақынның Сана, Сезім (қасірет, ашу, ұят), Ерік сияқты категорияларға берген сипаттамаларын талдайды. Кітап жалпы оқырмандарға, әдебиетшілерге, тілшілерге, философтарға, педагогтарға, психологтарға және студенттерге арналған. Көлемі 4,3 баспа табақ, 10 000 дана болып басылған.