Абай Құнанбаев (Мұхтар Әуезов)

«Абай Құнанбаев» - ҚазССР ғылым академиясының «Ғылым» баспасынан 1967 жарық жарық көрген ғылыми еңбек. Авторы - М. О. Әуезов. Әуезовтың абайтану ілімінің негізін қалауға қосқан қызметіне арналған бұл еңбек Ы. Т. Дүйсенбаевтың алғы сөзімен ашылады. Кітапқа автордың қазақ және орыс тілдерінде мерзімдік басылымдар мен әр түрлі жинақтарда жарық көрген Абайға және оның туындыларына қатысты моногр. зерттеу еңбектері («Абай (Ибраһим) Құнанбайұлы», «Абайды тану», «Абайдың өмірбаяны» т. б.) мен ғылыми мақалалары («Абай ақындығының айналасы», «Абай еңбектерінің биік нысанасы», «Абай мұрасы жайында» т. б.) топтастырылған. Оларда Абайдың балалық, жастық шақтарына, ақындық ортасына, сол кездегі қоғамдық-саяси қарым-қатынастарға шолу жасалады. Абай мұраларының идеялық, көркемдік сапасы, дәстүр, түр жаңашылдығы, адамгершілік, азаттық тәлім-тәрбиелік ойлары ашып көрсетіледі. Ақындық ерекшелігі, тіл шеберлігі, этикалық, эстетикалық, педагогалық, философиялық көзқарастары, шығыс пен батыс елдері, орыс классиктерімен жалғастығы сөз болады. Кітап соңында еңбектердің әрқайсысына түсініктеме қашан және қайда жарияланғаны туралы мәліметтер берілген. Жинақ әдебиет зерттеушілеріне, тіл білімі мамандарына, аспиранттарға, студенттерге, көпшілік оқырмандарға арналған. Көлемі 25,5 баспа табақ, 4 мың дана болып басылған.