Абай (тәуелсіз журнал)

«Абай» - әдеби-көркем тәуелсіз журнал. 1992 жылдан шыға бастады. 1918 ж. М. Әуезов пен Ж. Аймауытов негізін салған осы аттас журналдың заңды жалғасы. Шығарушы - «Парыз» шығармашылық тобы. Демеушісі - Республикалық Абай қоры. Журнал негізінен ұлы ақынның өмірі мен шығармашылық жолын жүйелі зерттеп, жан-жақты сөз етуді мақсат тұтқан. Ол үшін абайтану ғылымының өзекті мәселелерін қозғап, ақын жайлы бұрын-соңды баспасөзде жарық көрген материалдарды, пікірталасты оқырман қауым тезіне қайта ұсынады, кезінде ақынның төңірегінде болған үзеңгілес дос-жарандарының, ұрпақтарының, кез көрген ауылдас адамдардың естеліктерін, деректі құжаттарды жариялайды, Абайдың ақындық мектебінен шыққан шәкірттерінің өлең-жырлары және бүгінгі қазақ әдебиетінде ілгері ұласқан жаңашылдық пен дәстүр жалғастығы хақында кең көлемде сөз қозғайды. Сонымен қатар бүгінгі қазақ ақын-жазушыларының, комп. мен суретшілердің ұлы ақынға арналған жаңа шығармаларын да жариялап отырады. Журналдың көлемі 9,3 б. т. Редакторы Р. Мұсаұлы.