Аймақов Оразхан Аймакович

Аймақов Оразхан Аймакович — химия ғылымының докторы, Халықаралық педагогикалық білім беру академиясының корреспондент мүшесі, «Химия және биотехнология» кафедрасының қауымдастырылған профессоры, С.Сейфуллин атындағы Қазақ агротехникалық университетінің «Биологиялық белсенді заттарды зерттеудің физикалық-химиялық әдістері» ғылыми-зерттеу зертханасының меңгерушісі.

О.А.Аймақов — элементорганикалық қосылыстар химиясы, органикалық, биоорганикалық химия, биологиялық белсенді қосылыстар химиясы саласындағы белгілі ғалым, «Қазақстан Республикасының Жоғары оқу орнының үздік оқытушысы - 2006» мемлекеттік грантының иегері.

О.А.Аймақовтың зерттеу нәтижесінде алынған «АНАБТИОФОС», «АНАБАЗИЛФОСФАТ», «ЭФАМФОС» биологиялық препараттары Мәскеуде (2002–2003 жж.) өткен «БИОТЕХНОЛОГИЯНЫҢ ҚАЗІРГІ КЕЗЕҢДЕГІ ЖАҒДАЙЫ ЖӘНЕ ДАМУ БОЛАШАҒЫ» атты І және ІІ Халықаралық конгресі, «ХХІ ғасырдағы ғылым мен білімнің дамуы» атты Халықаралық көрмесіне (2006–2009 жж.), Астана, Конгресс-холл) қойылды.

Әзірленген «Жаңа отандық антиозонант — ВИНФЕН» жобасы еліміздің шина өнеркәсібіне енгізу сатысында.

О.А.Аймақов 1998–2001, 2003–2010 жылдар аралығында Ш.Уәлиханов атындағы Көкшетау мемлекеттік университетінің химия және биотехнология кафедрасының меңгерушісі болды. Профессор О.А.Аймақовтың Солтүстік өңірдегі химия ғылымы мен биотехнологиясының дамуына қосқан үлесі «Қазақ энциклопедиялары» баспасынан шыққан «Ақмола облысының энциклопедиясында» жарияланды (Алматы, 2009 ж.).

Ш.Уәлиханов атындағы Көкшетау университетінде 1998 жылы «Химия» мамандығы бойынша магистратура және 2005 жылы «Биотехнология» мамандығы ашылды.

Профессор О.А.Аймақов Қазақстан Республикасы Білім министрлігі және Ғылым комитеті тарапынан ұйымдастырылған инновациялық ғылыми жобасы конкурсының жеңімпазы атанып, Қазақстан Республикасы ЖОО ғылыми орталықтары, Ресей Федерациясы, Жапон университеттерімен материалдық-техникалық базасын және ғылыми байланыстарды күшейту мақсатында Жапонияда өндірілген инженерлік кәсіби «ЯМР СПЕКТРОСКОПИЯ ЗЕРТХАНАСЫН» сатып алу құқығына ие болды.

О.А.Аймақов халықаралық конференциялардың, симпозиумдардың, ғылыми семинарлардың жұмысына белсенді қатысады, Халықаралық ғылыми орталықтармен, жақын және алыс шетелдердің ғалымдарымен ғылыми байланыстарды қолдайды.

Қазақстан Республикасы Білім және ғылым министрлігі мен Ғылым комитеті тарапынан О.А.Аймақовтың «Гумин табиғатының биологиялық белсенді жемшөп қоспаларын әзірлеу және жасау» (Қазақстан – Ресей), «Жоғары тиімді пестицидтік биопрепараттарды әзірлеу және жасау» (Қазақстан – Украина), «Биологиялық белсенді заттар негізінде жаңа нанокомпозициялық материалдар жасау» ғылыми жобалары «ЭКСПО – 2017» конкурсына қатысып, ҚР БҒМ Ғылым комитетінің ғылыми бағдарламаларының тізбесіне енгізілді (2019 ж.).

О.А.Аймақовтың 235-тен астам ғылыми еңбектері, КСРО-ның 4 авторлық куәлігі, өнертабыс пен ғылыми жаңалықтары және Қазақстан Республикасының 4 патенті жарияланды.

Химия ғылымдарының докторы, қауымдастырылған профессор О.А.Аймақовтың жетекшілігімен гетерофункционалды биологиялық белсенді қосылыстар, биотехнология, табиғи және элементорганикалық қосылыстар химиясы салалары бойынша 3 кандидаттық диссертация, 30-дан астам магистрлік диссертация, 115-тен астам дипломдық жұмыс қорғалды.

Қазіргі уақытта О.А.Аймақов жас ғалымдарды, магистранттар мен студенттердің ғылыми ізденістеріне ғылыми жетекшілік көрсетіп, элементорганикалық, табиғи және гетероциклді қосылыстар химиясы, тағам химиясы, биомедицина саласындағы ғылыми зерттеулерді белсенді түрде жалғастыруда.