Акинезия

Акинезия (греч. ἀκῑνησία а — теріс бөлшек және kínēsis — қимыл-қозғалыс)— адамның өздігінен аяқ-қолын қимыл-қозғалысқа келтіре алмай қиналуы немесе салдану, буынның қозғалмауы және ауырсыну салдарынан ерікті қозғалыстың күші, көлемі және жылдамдығының өзгеруі. Бұл ауру мидың терең құрылымдарының, бұлшықет тонусын бақылайтын және қозғалысқа жауап беретін фронтальды аймақтары зақымдалғанда, кататоникалық жағдайлармен, депрессиялық ступормен, метаболикалық энцефалопатиялармен және миопатиялармен байланысты, көбінесе бүйрек жеткіліксіздігінің ауыр түрлерімен байланысты (уремиялық кататоникалық синдром), бауыр (бауыр депрессиялық акинезиясы), гемопоэз (гемолитикалық анемияның ауыр түрлері), тыныс алу (гипоксиялық энцефалопатия), осы мүшелердің зақымдануымен сипатталатын кейбір ауыр инфекциялар мен интоксикациялар кезінде болады. Мұндай кеселге адам долданып ашу-ызаға булыққан кезінде ұшырауы мүмкін. Аурудың бұл түрі кейбір жағдайда адамды әлсіздендіріп, қимыл-қозғалыс әрекеттерін баяулатады. Бұл жайт гипокинез деп те аталады. Ауруды емдеу оның түрі мен сипатына орай жүргізіледі.