Алмастыру албары

Алмастыру албары – 18-19 ғасырлардағы сауда мен тауарларды жинау орны. Өзінің атауын сауданың негізгі тәсілі – тауар алмасудан алған, ол сауданың тиімді түрі болып табылған.

Петропавал қаласындағы алмастыру албары тарихы

Алмастыру албары Петропавл қаласында 1759-70 жылдары патша жарлығымен әулие Петр бекінісінде салынды. Сауда бекініс зеңбіректерінің қорғауында жүргізілді, бекіністегі сауда алаңы қарауылмен күзетілді. Жергілікті тұрғындар саудаға негізінен ірі-қараны, сондай-ақ қойларды өткізді, малдың, түлкінің, қарсақтың, қасқырдың, қоянның және басқа аң терлерін, жүн, ешкінің түбітін, жылқының қылын, сиыр мен қойдың майын, т.б. сатты. Орыс көпестері темір қазан, істік, тағандар, шұға, астық, ұн, жарма, т.б. әкелді. Қытайлықтар түйе керуенмен мақта-мата, жібек материалдары, олардан тігілген бұйымдар, аң терлері, түйе жүнінен тоқылған маталар, мәсі, кілемдер, киіздер, кептірілген жемістер тасыды. 1825 жылға дейін қазақтар еріксіздерді сатты, әулие Петр бекінісі оларды сатып алатын басты базарға айналды. Ғасырдың аяғында алмастыру албарының маңызы Дала өлкесі үшін мал өнімдерін көтерме саудаға салатын қойма пункті ретінде арта түсті, онда бактериологиялық және мал дәрігерлік стансалар жұмыс істеді. 1910 жылы алмастыру албарынан 217 мың пұт тері, 137 мың қой терісі, 111 мың пұт жүн, жылқының 5 мың пұт қылы жөнелтілді. 1915 жылы сауда айналымы 20 млн. сомнан асты. 19-ғасыр аяғында қаланың өсуіне байланысты алмастыру албары темір жол стансасына таман көшірілді, ол қазіргі аз литражды двигателдер зауытының аумағы болып табылады.