Алғы сөз

Алғы сөз — белгілі бір шығармаға арналып жазылған түсініктеме. Негізгі текстің алдынан беріледі. Автордың өмірі, шығарманың мақсаты, түрі, жазылу себебі, құрылысы, маңызы т.б. жөнінде мәлімет келтіріледі. Кімнің жазғанына байланысты Алғы сөзді түрлендіріп беруге болады (“Редактордан”, “Автордан”, “Құрастырушыдан”, “Аудармашыдан”, “Баспадан” т.б.). А.Жұбановтың “Құрманғазы” монографиясына (1960), С.Мұқановтың “Мөлдір махаббат” романына (1959), М.Мақатаевтың “Қош бол, махаббат” кітабына (1988) жазылған Алғы сөз таңдаулы үлгіге жатады. Кейде Алғы сөздің міндетін соңғы сөз атқарады. Әдеби шығарманың беташары секілді берілетін алғы сөзді аңдату деп атайды.