Аманат Назарқұл

Аманат Назарқұл (1959) – суретші. Алматы суретшілер училищесін (1982), Мәскеудегі И.В. Суриков атындағы мемлекеттік суретшілер Академиясының монументальды сыр-шырай факультетін (проф. К.А. Тутевольдің класы бойынша 1991) бітірген КСРО суретшілер Одағының мүшесі. Назарқұл 1991 – 2003 ж. республикалық және халықаралық көрмелерге қатысып, жүлделі орындарға ие болды. Соның ішінде 2000 ж. Алматыда өткен халықар. «Мастер – класс» фестивалінің бірінші жүлдегері атанды. 2001 ж. Астанада жаңадан ашылған «Қазіргі заман музейінде», «Қазақстан Республикасы Президентінің мәдениет орталығында» (2002) жеке көрмелер өткізді. Суретшінің «Скифтер – Кентаврлар» (1997); «Бабалар рухы» (1998); «Үш грация» (1999); «Томирис» (1999); «Азия Бибі» (2000); «Түнгі жолаушы» (2000), «Аралды аңсау» (2000), «Қорқыттың үш бұлағы» (2000) атты шығармалары орындалу стилі жағынан әрқилы болғанмен, жан дүниесінің тынымсыз ізденісін, тысқы дүниемен үйлесімді байланысын білдіретін туындылар өзіндік көзқарасы бар, батыл, тәуекелі мол суреткер. Бұл тұрғыда оның тері өңдеудің көне, далалық технологиясымен байланысты «Таудағы қыз» (1999), «Заратуштра» (2000), «Тәңірі» (2000), «Құс» (2000) сияқты туындылары жоғары бағаға ие болды.

Аманат Назарқұл
Дүниеге келгені:	28.6.1959 Тараз қаласы
Мансабы:	суретші