Эклогит

Эклогит (грек. ekloge – таңдау, сұрыптау) – гранат (пироп) пен пироксеннен (омфацит) тұратын, кейпі кристалл түйірлі, шомбал немесе тақтатасты тау жынысы. Хим. құрамы жағынан Э. габбро-норитке сәйкес келеді, бірақ тығызд. одан жоғары (3,35 – 4,2 г/см3). Жанама және акцессорлық минералдарына рутил, кианит, корунд, санидин, коэсит, энстатит, графит, алмаз, флогопит жатады. Зерттеушілер Э-ті жоғары темп-ра мен жоғары қысым жағдайында пайда болған метаморфтық тау жынысына жатқызады. Э-тің орташа тереңдіктердегі метаморфтық кешендерге тән келетіндігі анықталған. Э. амфиболиттік, гранулиттік формацияларға жататын, күшті метаморфтануға шалынған тау жыныстарында ұшырасады. Ол Ресейде Сібір кимберлит түтіктерінен, Қазақстанда Көкшетау қыратынан табылған.