Экономикалық бостандықтың конституциялық кепілдіктері

Экономикалық бостандықтың конституциялық кепілдіктері – Қазақстан Республикасының Конституциясында көзделген еркін экономикалық қызметтің болуы мен дамуын қамтамасыз ететін заңи қағидалар, тәсілдер мен құралдар кешені. ҚР Конституциясына сәйкес әркімнің кәсіпкерлік қызмет және заңда тыйым салынбаған басқа да экон. Қызмет үшін өзінің қабілет-қарымы мен мүлкін еркін пайдалануға құқығы бар. Монополиялауға және жосықсыз бәсекеге бағытталған экон. Қызметке жол берілмейді. Жеке меншік құқығы заңмен қорғалады. Әркім меншігінде мүліктің болуына, оны жеке дара да, басқа тұлғалармен бірлесіп те иеленуге, пайдалануға, билеуіне құқылы. Жеке адамның мүлкін соттың шешімінсіз ешкім де айыра алмайды. Тек алдын ала және тең бағамен орны толтырылған жағдайда ғана мемлекеттің мұқтаждары үшін мүліктен мәжбүрлеп айыруға болады. Мұралану құқығына мемлекет кепілдік береді. Азаматтар және олардың бірлестіктері жерді меншіктенуге құқылы. Жерді және басқа табиғат ресурстарын меншіктенушілер олардың осы меншіктенуі қоршаған ортаға зиян келтірмейтін болса және өзге тұлғалардың құқықтары мен заңды мүдделерін бұзбайтын болса, оларды иеленуіне, пайдалануына және оларға өкім жүргізуіне болады. Жерді пайдалану шарттары мен тәртібі Қазақстан Республикасының Жер кодекісі негізінде айқындалады. Қазақстанда адамның және азаматтың құқықтары мен бостандығын, соның ішінде экон. Құқықтары мен бостандығын да мемл. Қорғауға конституциямен кепілдік берілген. Әркім өзінің құқықтары мен бостандықтарын заңда тыйым салынбаған барлық тәсілдермен қорғауға құқылы. Конституциялық құқықтар мен бостандықтар сот арқылы қорғалады. Мемл. Билік органдары мен жергілікті өзін өзі басқару органдарының, қоғамдық бірлестіктер мен лауазымды адамдардың шешімдері мен әрекеті (әрекетсіздігі) жөнінде сотқа шағынуға болады. ҚР-ның халықар. Шарттарына сәйкес әркімнің құқықты қорғаудың мемлекет ішіндегі барлық құралдары сарқылған жағдайда адамның құқықтары мен бостандықтарын қорғау жөніндегі мемлекетаралық органдарға жүгінуге құқығы бар. Әркім мемл. Билік органдары немесе олардың лауазымды тұлғалары заңсыз әрекетпен (әрекетсіздікпен) келтірген зиянның өтемін алуға құқылы.