Архимандрит

Архимандрит (гр. archі — басты, mandra — ауыспалы мағынада монархтық ұйым) — христиан діні шіркеуінің басқару жүйесіндегі орта (екінші) дәрежелі дін қызметкері, православиелік және кейбір басқа да христиан шіркеулеріндегі ең жоғары монархтық шен, ерлер монастрлерін басқарушылардың құрметті лауазымы.

Архимандрит Иоаникий (Голятовский)

Алғаш А. лауазымы б.з.б. 5 ғ-да православиелік Константинополь шіркеуінде енгізілген. Кейінірек бұл лауазым құрметтеліп, епархиядағы ірі монастырь игумендеріне (басқарушыларына) берілетін болды. Киев Русінде А. шені бүкіл епархиядан тек бір ғана игуменге берілген. Жоғары дәрежедегі бұл лауазымды алғаш рет 1174 ж. Киев-Печера монастырінің игумені Поликарп иеленген. 1226 ж. Юрьев монастырінде де А. шені берілгені туралы мәлімет бар. Бұл шен 19-20 ғ-ларда тек монастырь басшыларына ғана емес, діни жоғары әкімш. қызметтегілерге де (діни оқу орындарының ректорларына, діни миссия басшыларына т.б.) берілетін болды. А. шенін беру рәсімі литургиядан (діни жоралғылар) соң айрықша ережелермен өткізіледі. А-ке архиерейдің кейбір шек-шекпендері: мантия (ұзын шапан), скрижали (қасиетті жазбалар), митра (бас киім), аса таяқ, күрзі және архимандриттің крест жүзігі қоса тапсырылады.