Астанаға 20 жыл медалі

«Астанаға 20 жыл» медалі — мерейтойлық медаль, Қазақстан Республикасының мемлекеттік марапаты.

«Астанаға 20 жыл» медалі
Мемлекет	Қазақстан
Түрі	Медаль
Жағдайы	беріледі
Негізделді	17 сәуір 2018 жыл

Қазақстан Республикасының Президенті Нұрсұлтан Назарбаевтың 2018 жылғы 17 сәуірдегі Жарлығына сәйкес елорданың Астана қаласына көшірілгеніне 20 жыл толуын тойлау мақсатында құрылған.

Медал жайлы ереже

1. Мерейтойлық медалмен Қазақстан Республикасы мен оның астанасының қалыптасуы мен дамуына елеулі үлес қосқан Қазақстан Республикасының азаматтары мен шетел азаматтары марапатталады.
2. Мерейтойлық медальмен марапаттау туралы Қазақстан Республикасының Президентіне Қазақстан Республикасы Парламенті палаталарының, Үкіметінің, Конституциялық Кеңесінің, Жоғарғы Сотының, Қазақстан Республикасының министрліктерінің, өзге де орталық мемлекеттік органдарының төрағалары, Астана және Алматы қалаларының, облыстардың әкімдері, қоғамдық бірлестіктер ұсыныстар енгізеді.
3. Мерейтойлық медалді Қазақстан Республикасының Президенті марапаттайды, сондай-ақ Қазақстан Республикасы Президентінің тапсырмасы және атынан: Қазақстан Республикасының Мемлекеттік хатшысы; Қазақстан Республикасы Парламенті палаталарының төрағалары; Қазақстан Республикасы Үкіметінің мүшелері; Астана және Алматы қалаларының, облыстардың әкімдері; басқа шенеуніктер табыстай алады.
4. Мерейтойлық медальді табыс ету салтанатты жағдайда, көпшілік алдында және алушыға жеке табыс етіледі. Марапаттаудың алдында Қазақстан Республикасы Президентінің марапат туралы Жарлығы жарияланады.
5. Әрбір марапатталушыға мерейтойлық медалді тапсырумен бір мезгілде тиісті куәлік беріледі.
6. Мерейтойлық медалді тапсыру туралы белгіленген үлгідегі хаттама жасалады, ол тұлғаның қолымен, табыс етуді жүзеге асырған органның мөрімен бекітіледі және Қазақстан Республикасы Президентінің Әкімшілігіне жолданады.
7. Мерейтойлық медаль кеуденің сол жағында Қазақстан Республикасының мемлекеттік марапаттары болса, олардан кейін орналасады;
8. Орындалған марапаттауларды есепке алуды, сондай-ақ мерейтойлық медалдармен марапаттау барысы туралы есептілікті Қазақстан Республикасы Президентінің Әкімшілігі жүргізеді.

Сипаттамасы

Мерейтойлық медаль белгі мен тағаннан тұрады. Мерейтойлық медалдің белгісі сары жезден жасалған диаметрі 34 мм шеңбер болып табылады.

Мерекелік медалдың беткі жағында 25 мм диаметр шеңбердің ішінде Астананың танымал ғимараттарының бейнесі орналасқан: бірінші көріністе ортада — «Астана Бәйтерек» монументі, екінші көріністе солдан оңға қарай Қазақстан Республикасы Президентінің «Ақорда» резиденциясы, Бейбітшілік және келісім сарайы, сондай-ақ Тәуелсіздік монументі, шетін бойлай бет жағының жоғарғы бөлігінде — «АСТАНА», астында «20 ЖЫЛ» мәтіндері орналасқан, мәтіндердің арасында екі жағынан ұлттық ою-өрнек бейнеленген.

Мерекелік медалдың артқы жағында шеңбер бейнеленген, оның ортасында диаметрі 25 мм «ҚАЗАҚСТАН РЕСПУБЛИКАСЫ 2018» деген жазу жазылған, арт жағының шетін бойлай ұлттық ою-өрнек бейнеленген.

Мерекелік медалдағы барлық бейнелер мен жазулар шығыңқы, жылтырақ, күңгірт аяда орналасқан. Мерекелік медал құлақша мен шығыршық арқылы ені 32 мм және биіктігі 50 мм тікбұрышты тағанмен жалғасады. Таған ені 32 мм көгілдір түсті жібек қатқыл таспамен қапталған. Таспаның сол жағынан ені 7 мм қызыл түсті жолақ өтеді, оның оң жағынан ені 3 мм екі сары жолақ өтеді. Сары жолақтардың арасындағы қашықтық 1 мм.

Тағанның артқы жағында бұйымды киімге бекітетін қалқалы бекітпесі бар түйреуіш орналасқан.

Медал Өскемен қаласындағы Қазақстан теңге сарайында дайындалды.