Астана (концерт залы)

«Астана» концерт залы – Республикалық маңызы бар тарих және мәдениет ескерткіштерінің мемлекеттік тізіміне енген сәулет өнері ескерткіші.

«Астана» концерт залы
Бұрынғы атауы	Тың игерушілер сарайы
Жалпы мәлімет
Орналасқан қала	Астана
Мемлекет	Қазақстан
Құрылысы басталды	1961 жыл
Құрылысы аяқталды	1963 жыл
Дизайны мен құрылымы
Сәулетшісі	П. Фогелс, О. Крауклис, Д. Даннеберг

Орналасқан жері

Астана қаласы, Кенесары көшесі.

Кезеңі

1963 жыл.

Тарихи деректер, сипаты

Ғимарат латвиялық сәулетшілер П. Фогелс, О. Крауклис және Д. Даннебергтің жобасы бойынша тұрғызылған. Алғашында 2500 орны бар тың игерушілер сарайы ретінде салынған. Сахна пердесі суретші С.А. Умановтың жетекшілігімен КСРО Үлкен театрының шеберханаларында жасалды. Сахна көтеру механизмі мен басқару панелімен жабдықталған. Сарай ішінде 1200 шам және 82 дауыс зорайтқыш орнатылған. Киноаппарат бөлмесінде он проектор бар, ал киноэкран өлшемі 34 м.х13,1 м. Сарайдың кіреберіс залы бүкіл Одақтан жіберілген әралуан экзотикалық өсімдіктері бар ботаникалық бақпен безендірілген. Ғимарат өзіндік сәулетімен және функционалы кең залымен ерекшеленеді: өте жақсы акустика, ауаны баптау кондиционерлері, заманауи сахналық механизмдер, залдың қайталанбас безендірулері. Бұл ерекшеліктер оны тұрғындар арасында мәдени демалысқа арналған танымал орын етті. Мәнерлі, ерекше сыртқы көрінісі бұл ғимаратты Ақмола қаласының визит картасына айналдырды.
Ғимарат 1982 жылы республикалық маңызы бар Тарих және мәдениет ескерткіштері тізіміне енгізілді.
1998 жылы ғимарат қайта жөндеуден өтіп, 1609 орны бар «Конгресс-холл» деген жаңа атауға ие болды. «Конгресс Холл» республика Президенті мен Қазақстан Республикасының Үкіметі қатысуымен өтетін қоғамдық және мемлекеттік іс-шараларды өткізу орны болды.
2017 жылы ғимарат атауы «Астана» концерт залы деп өзгертілді. Ол - халықаралық стандарттарға сай және қала тұрғындары мен қонақтарының сүйікті мәдени демалыс орны.