Ақан Оңғарұлы
Ақан Оңғарұлы – қазақстандық тарихшы, археолог, тарих ғылымдарының кандидаты. 2021 жылдан бастап А.Х. Марғұлан атындағы Археология институтының бас директоры.
| Ақан Оңғарұлы | |
| Туған күні | |
|---|---|
| Азаматтығы |
Қазақстан |
| Жұмыс орны |
А.Х. Марғұлан атындағы Археология институтының бас директоры. |
| Ғылыми дәрежесі |
арих ғылымдарының кандидаты |
| Альма-матер |
Қазақ Ұлттық университеті |
Қазақстан археологиясы (Археология Казахстана) журналының бас редакторы, ғылыми қызығушылығы Евразияның далалық белдеуіндегі ерте темір дәуірінің археологиялық мәдениеттерін зерттеумен байланысты. Оның зерттеу салаларына жерлеу рәсімдері, құрылыс ерекшеліктері, палеоархитектура, ат әбзелдері, қару-жарақ және әскери іс, мәдени байланыстар, палеоэкономика, ежелгі технологиялар, өнер мен дүниетаным сияқты тақырыптар кіреді. Сонымен қатар, зерттеушінің шығармашылық жолында "Хунну және Евразия ғұндары", "Қазақстанның материалдық және рухани мәдени мұрасын сақтау, қорғау және насихаттау" сияқты тақырыптар ерекше орын алады[1].
Білімі мен еңбек жолы
Ақан Оңғарұлы 2001 жылы әл-Фараби атындағы Қазақ Ұлттық университетінің археология және этнология мамандығы бойынша магистратурасын үздік аяқтады.
Оның ғылымға деген қызығушылығы 1997 жылы А.Х. Марғұлан атындағы Археология институтының Зейнолла Самашев басшылығымен жүргізілген Майемер жазығындағы халықаралық экспедицияға қатысуынан басталды. Студенттік жылдары Берел ескерткішіндегі қазба жұмыстарына қатысып, онда табылған артефактілер қазақ Алтайының ежелгі халқының материалдық және рухани мәдениетін зерттеуге ықпал етті. Бұл тәжірибе оның ғылыми қағидаттарын қалыптастыруға әсер етіп, кандидаттық диссертациясын табысты қорғауға негіз болды.
2021 жылдың 19 тамызында ҚР БҒМ Ғылым комитетінің төрағасы Жанна Құрманғалиева А.Х. Марғұлан атындағы Археология институтының ұжымымен кездесті. Кездесу барысында конкурстық комиссияның шешімі бойынша институттың жаңа бас директоры болып тағайындалған Ақан Оңғарұлын таныстырды[2]. А.Х. Марғұлан атындағы Археология институтының басқарып, ғылыми зерттеулер аясындағы бағдарламалық-мақсаттық және гранттық қаржыландыруға арналған бірнеше жобаларды жүзеге асыруға жауапты.
Ғылыми еңбектері
Ақан Оңғарұлы 100-ден астам ғылыми еңбектердің, оның ішінде Қазақстанда және шетелде жарық көрген мақалалар, кітаптар мен каталогтардың авторы және қосалқы авторы.