Ақпарат бостандығы

Ақпарат бостандығы — ақпаратты жариялау бостандығы мен ақпарат құралдарына қол жеткізу бостандығын қамтитын құқықтық ұғым. Сөз бостандығы мен баспасөз бостандығы ұғымдарымен қатар тұрып, ол барлық адамға тән негізгі құқытарының бірі болып келеді.

Мәселен, БҰҰ шығарған Адам құқықтарының жалпыға бірдей декларациясында әркімнің кез келген құралмен және мемлекеттік шекараларға қарамай ақпаратты іздеуге, алуға және таратуға құқылы екені жазылған (19-бап).

Сол секілді Қазақстан Республикасының Конституциясында, 20-бабында да бұған қатысты сілтеме бар: «Әркімнің заң жүзінде тыйым салынбаған кез келген тәсілмен еркін ақпарат алуға және таратуға құқығы бар».

Бұл құқықты бұзу үшін көп елдерде әкімшілік немесе қылмыстық жаза қолданылады. Мысалы, Қазақстан Республикасының Қылмыстық Кодексінде «Ақпараттық ресурстарға қол жеткiзу құқығын заңсыз шектеу» деген қылмыс түрі келтірілген (159-бап).

Тағы қараңыз

• Ашық мемлекет
• Ақпараттық қоғам
• Цензура