Ақтау Өндірістік Бірлестігі

Ақтау Өндірістік Бірлестігі– мұнай-химия өнімдерін шығаратын ірі акционерлік кәсіпорын. Ақтау қаласында орналасқан. Негізі 1981 жылы қаланды. Қазақстанда полистрол, стирол пластиктерінің барлық түрлерін өндіретін бірден-бір ірі кәсіпорын. Полистролдан жылу, дыбыс өткізбейтін материалдар, автокөлікке қажетті тетіктер жасайды. Кәсіпорында өндіретін полистролдың кейбір түрлері құрылыста энергия үнемдеу технологиясына пайдаланылады. АҚ әлемдік рынокқа сапалы тауар бергені үшін Ақтау Өндірістік Бірлестігі 1993 ж. Мадридте “Еуропа Аркасы”сыйлығын, ал 1994 ж. Копенгагенде халықаралық кәсіпкерлер одағының “Әлемнің алтын глобусы” сыйлығын алды. Оның өнімдері Италия, Түркия, Германия, Қытай, Иран, Ресей, Украина т. б. көптеген елдерге шығарылады. Ақтау қаласында шығатын полистрол, стирол өнімдері сұранысқа сай жыл сайын 3-4 процентке өсіп отыр. Ақтау Өндірістік Бірлестігі мұнай өңдеу жұмысымен де айналыса бастады. Оның жылдық өнім көлемі млн. тоннадан асып отыр. Негізінен бензин, дизельдік отын және жағар май өндіріледі. Мұның сыртында ішкі рынок қажетіне керекті газ және жеңіл фракциялы газ конденсатын шығарады.