Ақырап Құдайбергенұлы Жұбанов

Ақырап Құдайбергенұлы Жұбанов (7.11.1927 ж. туған, Ақтөбе)-суретші, Қазақстанның еңбегі сіңген мәдениет қайраткері (1989). Алматы театр және көркемсурет училищесін (1947), Ленинград (қазіргі Санкт-Петербург) жоғарғы көркем-кәсіби училищесін бітірген (1958). 1947- 48 ж. орта мектепте, 1949 - 52 ж. Петропавл педагогикалық училищесінде мұғалім болды. 1958 -59 ж. Қазақстан Ұлттық ғылым академиясының өнертану секторының кіші ғылыми қызметкері, 1959 - 60 ж. Қазақстан Суретшілер одағының шығармашылық секциясы бастығының орынбасары, 1960 - 62 ж. Қазақстанның Жергілікті өнеркәсіп минисрлігінің бас суретшісі, 1962 - 63 ж. Әдебиет және өнер институтының кіші ғылыми қызметкері, 1963 - 82 ж. Алматы көркемсурет училищесінің директоры, 1982 - 84 ж. Алматы қалалық атқару комитетінің Бас архитектура-жобалау басқармасында бас суретшісі, 1984 - 92 ж. Алматы көркемсурет училищесінің директоры қызметтерін атқарды. Жұбанов - Қазақстанның "Атакент" іскерлік-ынтымақтастық орталығының "Қазақстан" (1959), "Жеңіл өнеркәсіп" (1960), "Қазақстанның ауыр өнеркәсібі" (1966 - 67) павильондарын, Алматыдағы геология мұражайының (1968) безендіру жобасы авторларының бірі.