Байысов ауылы

Байысов - Ескелді ауданындағы ауыл, Қарабұлақ кентінің округі кұрамында. Аудан орталығы — Қарабұлақ кентінен батысқа қарай 9 км жерде, Көксу мен Қаратал өзені аралығында, боз жусан аралас эфемероидті шөп¬тесін басым өскен шалғынды сұр топырақты құрғақ далада орналасқан. Тұрғыны 1,2 мың адам (2002). Ауыл 1998 жылға дейін "Буденное" деп аталып келді. Ауылға осы елді мекенде туып-өскен Кеңес Одағының Батыры Матай Байысовтың есімі берілді (1998). Ауылда бұрынғы кеңшар негізінде шаруа қожалықтары құрылды. Орта мектеп, клуб, кітапхана, фельдшерлік-акушерлік пункт, т.б. мекемелер бар. Тұрғындары басқа елді мекендермен автомобиль жолы арқылы қатынасады.