Бактерия ұстағыш

Бактерия ұстағыш – емханалардың, өндірістік және тұрғын үйлердің бөлмелерінде қандай микроағзалар бар екенін және олардың ауаны қаншалықты ластағанын анықтайтын аспап. Ю. А. Кротовтың бактерия ұстағышының ішінде айналып тұрған Петри тостағаншасында қатты қоректік орта болады. Аспаптың саңылауы арқылы оның ішіне тартылған ауа осы қоректік ортаға тиеді де, бактериялар соған жабысып қалады. Бактериялар ұстағыштың кейбір түрлеріне енген ауа сұйық (қоректік сорпа, су) немесе құрғақ (мақта) ұстағыштарға барып тиеді. С. С. Речменскийдің бактериялар ұстағышында ауаға бүркілген сұйық зат тамшылары бактериялармен бірге аспаптың ішкі қабырғасына жабысып қалады. Бактериялар ұстағышпен осылай ұсталған микробтар тиісі қоректік ортада өсіріліп, олардың түрі мен саны анықталады.