Балалар темір жолы

Мекеменің құрамы

Балалар темір жолы – Темір жол басқармасы оқу бөлімінің қарауында болатын мектептен тыс балалар мекемесі. Балалар темір жолының мақсаты – жас өспірімдердің темір жол транспортына ынтасын арттырып, техникалық шығармашылығын дамыту, оларды темір жол мамандығына бейімдеу. Балалар темір жолының жұмысы политехникалық білім берудің жүзеге асуына ықпал етеді. Балалар темір жолының бастығы педагогикалық тәжірибесі бар инженер болады. Балалар темір жолы бастығының жанында 2 кеңесші мүше болады:

1. Педагогтық кеңес (үйірме жетекшілерінен, жұртшылық өкілдері мен педагогтардан құралады).
2. Жас темір жолшылар кеңесі (оның құрамы үйірме мүшелерінің жалпы жиналысында сайланады).

Бірінші балалар темір жолы Тбилисиде (1935) ұйымдастырылды. Қазақстанда алғашқы балалар темір жолы 1946 ж. Целиноградта салынды. Республикада 3 қалада (Алматы, Қарағанды, Целиноград) балалар темір жолы бар. Республикамыздың балалар темір жолдарының жанында 1422 мүшесі бар түрлі техникалық 112 үйірме жұмыс істейді. Сонымен қатар темір жол мектерінде балалар темір жолдарының басқаруымен жұмыс істейтін 95 үйірме бар, оған 1081 оқушы қатысады (1971).