Бауыр ісігі

Бауыр обыры қатерлі ісіктің өте сирек кездесетін түрі, көбінесе бауыр циррозына байланысты 50-60 жастан кейін дамиды.

Сыртқы көрінісіне қарап бауыр обырының: 1)түйінді; 2)ауқымды; 3)жайылған түрлерін ажыратады. Обырдың түйінді түрінде бауырда бірнеше ісік түйіндері табылады. Олардың түрі ақшыл, сары немесе сарғыш жасыл, консистенциясы жұмсақ немесе қатты. Ісік түйіндері бірнеше жерден бір мезгілде өседі. Ауқымды обыр бауырдың бір бөлігінде ірі ісік түйіні түрінде өседі. Кесіп көргенде ол ақшыл сұр немесе некроз, қан құйылуға байланысты, шұбар түсте көрінеді. Жайылған обыр цирроздық өзгерістер негізінде дамиды, кейде ол бауыр ұлпасына араласа өсіп, сыртқы көрінісі анық білінбейді. Кейде обыр диагнозы микроскопиялық тексеруден кейін ғана қойылады.

Бауыр обырының туындау көзі бойынша бірнеше топтарға бөледі: 1)бауыр жасушалары обыры; 2)өт жолдары обыры; 3)аралас обыр; 4)жетілмеген обыр. Осылардың ішінде ең жиі ұшырайтыны гепатоллюлярлы обыр. обыр жасушалары трабекула типіндегі құрылымдар түзеді, кейде олардың арасында без түзілісі тәрізді саңылаулар пайда болады.

Холангиоцеллюлярлы обыр өт жолдарының эпителиіне ұқсайтын жасушалардан тұрып, безді обыр құрылысына ие болады. Жетілмеген обырға ашық түсті жасушалардан тұратын обыр және анаплазиялық обыр кіреді, олар жасуша атипизмінің басымдығымен сипатталады. Бауыр обыры лимфа түйіндеріне, гематогенді жолмен өкпеге, миға, бүйректерге метастаз береді. Кейде обыр түйіні бауырдың өзінде метастаз жолымен таралады.