Бағаны ырықтандыру
Бағаны ырықтандыру— мемлекет реттейтін баға жүйесінен нарықтық еркін баға жүйесіне көшу. Мемлекет тарапынан өндірістік, техникалық өнімдерге, тұтыну тауарларына, көрсетілетін қызметке баға тағайындалмай, инфляциялық құбылысты қаржы мен несие саясаты арқылы реттеу мақсатында қолданылады. Осының әсерінен тұтыну базарларында бағаның сұраныс пен ұсыныс арқылы қалыптасуына жағдай жасалады. Қазақстанда 1992 жылдан бастап Бағаны ырықтандыру жүзеге асырылды. Бұл шара, әсіресе, тауар өндірушілерге өндіріс тиімділігін қамтамасыз етуге бағытталған баға қоюға мүмкіндік берді. Бағаны ырықтандырудың бастапқы кезеңінде баға деңгейі күрт өскенімен, нарық кеңістігіндегі сұраныс пен ұсыныстың теңелуіне байланысты тұрақтанды. Мемлекеттің монополияны қадағалаушы органдары ел экономикасының кейбір салаларындағы бәсекелесі жоқ кәсіпорындардағы бағаларға қосылатын пайда деңгейінің негізділігін және қолданылуын бақылап отырады.[1]
Дереккөздер
өңдеу- ↑ «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, I том