Бестас ескерткіші

“Бестас”, “бесмін” — тастан жасалған, баспалдақ пішіндес ескерткіштердің ерекше түрі. Батыс Қазақстанның Маңғыстау, Үстірт, Ембі аңғары аймағында кең тараған. “Бестастар” құрылымы жағынан қабір үстіне қойылатын “үштас” ескерткіштердің, сондай-ақ, баспалдақты тұғырға орнатылатын “қойтастардың” жетілдірілген түрі болып табылады. “Бестастың” жоғарғы параллелепипедтері төменгілеріне қарағанда әлдеқайда жақсы өңделген. Олардың үстіне әр түрлі (көбінесе бояулы) бедерлі өрнектер салынады. Өрнексіз пирамида немесе сан қырлы етіп қашалған өте күрделі, көрнекті ескерткіштер түріндегі айрықша нұсқалары да кездеседі. Бұл тұрғыдан Үстірттегі Қамысбай, Сисем ата, Асан қожа қорымдарындағы “Бестастар” айтарлықтай назар аударарлық.