Борбай

Түсіндірме сөздіктегі мағынасы — аяқтың тізеден жоғарғы бөлігі, бұт. «...лай су ... борбайым мен сирақтарыма сорғалап...» (Сәкен Сейфуллин).

Сөз төркінін тек қана жүйесі басқа — парсы тілінен табуға болады. Бұл тілде: пәрпа немесе пәрпай — аяғы жүнді (құс туралы). Парсы тілінің өзінде «пәрпай» екі түбірдің бірігуінен пайда болған. Алғашқы «пәр» түбірінің бірнеше мағынасы бар, соның бірі — мықты, тегеурінд, ал «па» немесе «пай»— аяқ ұғымында қолданылады. Осы екі сөздің біріккеннен кейінгі мағынасынан — тегеурінді аяқ, мықты аяқ дегенді ұғынуға болады. Шынында да, аяқтың ең бұлшық етті, күшті бөлігі сан, бұт екендігін еске алсақ, бұл жорамалымызды теріс деу оңай емес. Борбай сөзі монғолдарда «борви» болып айтылады. Бұларға да парсы тілінен ауысуы мүмкін.