Бүйрек ісіктері

Бүйректерде эпителий ісіктері басқа ісіктерге қарағанда жиі кездеседі. Ісіктер бүйрек паренхимасының және түбекше ісіктері болып екіге бөлінеді. Бүйрек паренхимасынан аденомалар мен рак өсіп шығады. Аденомалар жасушаларының боялу қасиеттеріне қарап:көкшіл цитоплазмасы негізгі бояулармен қанық боялатын, "күңгірт жасушалы", қызғылт және ашық реңді жасушалы түрлерге бөлінеді.

Рак ісік жасушаларының микроскопиялық құрылыстары бойынша:ашық реңді жасушалы, түйіршікті жасушалы, ұршық тәрізді жасушалы және безді түрлеріне бөлінеді.

Бүйректің қатерлі ісігінің ерекше түріне нефробластома кіреді. Бұл ісік тек қана 1-5 жастағы балаларда кездесіп, олардың қатерлі ісіктерінің 20 пайызын құрайды. Микроскоппен қарағанда бұл ісік ұрық дәуіріндегі енді дамып жатқан бүйректі еске түсіреді. Вильмс ісігі үшін осы эпителилі компонентпен бір қатарда мезенхималы компоненттің болуы шарт. Егер мезенхима компоненттерінде қатерлі ісік белгілері табылса, ісіктің бұл түрін аденосаркома деп атайды.

Бүйрек түбекшесінен папиллома және рак өсіп шығады. Жасушалық құрылысына қарап рактың: бір-біріне өтуші жасушалы, жалпақ жасушалы және аденокарцинома түрлерін ажыратады. Негізінен бұл обыр түрлері бір-біріне өтуші жасушалардан түзілген болып, ісік папиллома тәрізді бүртіктене түбекшенің ішіне қарай өсіп тез некрозға ұшырайды. Жиі-жиі ісік түбекше ішін толтырып, несепағарды тығындап , оның айналасындағы ұлпаларға өсіп кіре бастайды. Осыған байланысты пиелонефрит, гидронефроз, егер инфекция түссе пионефроз дамиды. Ісік қуыққа имплантация жолымен таралады. Ісіктер негізінде гемотегенді жолмен бауырға, өкпеге, сүйектерге метастаз береді, лимфогенді метастаздар аймақтық лимфа түйіндерінде табылады. Бүйрек рагінің дамуында бүйрек тасы ауруының , кейбір химиялық заттардың маңызы зор.