Бұлақ басындағы оқиға

Бұлақ басындағы оқиға-"Қазақтелефильм" студиясының 2 бөлімді, ақ-қара түсті мультфильмі (1974).. Онда құстардың балапанын жыланнан қорғап, бәріне көмекке даяр тұратын, қайырымды әрі ержүрек діндар адам туралы баяндалған.

Осы мультфильмде қарапайым тастардан персонаждар жасалады. Мұндай "тастарды тірілту" Қазақстанда ғана емес, сол кезде бұл әдіс бүкіл Одақ бойынша жаналық болған еді. Оны ойластырып, идея тастаған суретші-натуралист Владимир Безелюк. Идеяны алдымен қабылдап, оны жүзеге асыру үшін атсалысқан студиядағы көркемдік кеңес мүшесі Исламбек Ташманов арнайы сценарий жазған. Нәтижесінде "Бұлақ басындағы оқиға" дейтін жаңа үлгімен жасалған мультфильм жарық көрді. Мұндай тәсілдің артықшылығы сол, оған қуыршақ жасаудың қажеті жоқ. Қаржылық жағынан да тиімді.

Оның персонаждары әртүрлі формадағы майда тастардан жасалады. Мысалы, фильмнің басты кейіпкері жылан болса, оны домалақ не сопақша тастарды ирек формада тізбектейді. Әрбір кадр сайын ол тастарды қозғап отырады. Оларды түсіретін фон да шөп, бұта, бұтақтардан жасалған. Табанына кәдімгі құм төселген. Су ғана целлофан арқылы көрсетілген. Режиссері: Сон-и-Сон.