Бұлдырық тұқымдастар(Pteroclididae) - кептертәріздестер отрядына жататын құстар құрамында 2 туыс, 16 түр бар. Бұлар үлкен денелі(300 - 550 г), қысқа мойнына кішкене бас жалғасқан, дене бітімі тығыз құстар. Қанаты - ұзын және үшкір. Аяғы қысқа, артқы саусағы қысқа немесе жоқ. Олардың барлығының рені шөл типтес(құм түстес, сарғыш қызыл, сары) болып келеді, өйткені тек шөл және шөлейтте қоныстанады. Өсімдіктердің тұқымымен, өсімді бөліктерімен, кейде бунақденелілермен қоректенеді. Суатқа міндетті түрде ұшып барады. Моногамды, яғни жеке жұп түзіп өмір сүреді. Ұялау маусымынан соң үлкен топ құрады. Бұлдырықтардың барлығының еті сапалы, сондықтан аңшылыққа пайдаланылады. Қазақстанда бұлдырықтардың екі туысынан 3 түр өмір сүреді. Бір кездері бұлдырықтардың саны өте көп болыпты және суатқа ұшып келген тобы <<күннің бетін жапқан>> көрінеді. Алайда 20 ғасырдың 70-жылдары бұлдырықтардың саны әжептәуір кеміп кеткен, ал осы онжылдықтың соныңда Қазақстанның Қызыл кітабына тіркелді.

Бұлдырықтардың негізгі туысы

Бұлдырықтардың негізгі туысы(Pterocles) - 14 түрі бар кептертәріздестер отрядының бұлдырықтар тұқымдасына жататын негізгі туысы. Бұлдырықтар тұқымдасының екінші туысы - қылқұйрық бұлдырық(убақ). Оның басқа түрлерден айырмашылығы - жіліншігінің сыртқы жағы қауырсынданбаған және онша үлкен емес артқы саусағы болады. Қазақстанда бұлдырықтар туысының 14 түрінен екі түр - қарабауыр және ақбауыр бұлдырықтар өмір сүреді.

Дереккөздер

Құстар. А.Ф.Ковшарь, В.А. Ковшарь