Василий Федорович Погорелов

Василий Федорович Погорелов (27.2.1925, Ақмола облысы, Сандықтау ауданы, Граниковка ауылы - 22.4.1977, Волгоград облысы, Серафимович қаласы) - 2-дүниежүзілік соғысқа қатысушы, гвардия лейтенанты, рота командирі, орыс.

1943 жылы Кеңес әскері қатарына алынып, ақпан айынан майданда болды. 1944 жылы кіші лейтенанттар курсын бітірді. 183-гвардиялық атқыштар полкінің (2-Украина майданы, 46-армия, 59-гвардиялық атқыштар дивизиясы) рота командирі. Погорелов полк жауынгерлерінен бірінші болып Венгрияның Эрчи қаласы тұсында Дунай өзенінен өтті. Плацдармдағы шайқас кезінде гвардия лейтенанты Погореловтың ротасы жаудың шабуылына тойтарыс беріп, 183-гвардиялық атқыштар полкінің басқа бөлімшелеріне өзеннен өтуге ыкпал етті. Осы ерлігі үшін КСРО Жоғарғы Кеңесі Төралқасының Жарлығымен Погореловқа Кеңес Одағының Батыры атағы беріліп, Ленин орденімен және «Алтын Жұлдыз» медалімен марапатталды (24.3.1945). «Қызыл Жұлдыз», 3-дәрежелі Даңқ ордендерінің иегері.

1946 жылы запасқа шықты. Волгоград облысында тұрып, Волга өзенінің балық инспекциясында жұмыс істеді.