Виктор Андреевич Грошев

Виктор Андреевич Грошев (10.9.1940, Қарағанды облысы Балқаш қаласы ) - ғылым, археолог, тарих ғылымдарының докторы (1997). 1971 жылы ҚазМУ-ді бітірген. Ғылыми еңбек жолын 1973 жылы Ш.Ш.Уәлиханов атындағы Тарих, археология және этнография институтында кіші ғылыми қызметкер ретінде бастаған. Қазіргі уақытта Ә.Марғұлан атындағы Археология институтында бас ғылыми қызметкер. 1973—93 жылы Оңтүстік Қазақстан мен Жетісуда б.з.б. 5 ғ. мен б.з. 18 ғ. аралығында жер суландыру және суармалы егістіктің қалыптасуы мен дамуын зерттеді. Қола және ерте темір дәуіріндегі жасанды суармалау мәселелерін көтерді. Отырар мен оның төңірегіндегі ортағасырлық қоныстар мен қалаларды сумен қамтамасыз ету, құлақарық имараттары (үлестіргіш каналдар, су қоймалары, құбырлар, бөгетшелер, т.б.) мен жер суландыру техникасының (шыгыр, т.б.) ерекшеліктерін анықтаумен айналысты. Ежелгі Отырардың агроирригациялық жоспарын анықтаған. Отырар алқабындағы Темірарық, Ақарық, Алтынарық, Саңғыларық, т.б. магистральды каналдардың жоспарын түсіріп, пайдаланылған уақыттарын белгілеп берді. Грошевтың көне егіншілік пен қалалардың дамуына жер суландырудың тигізген әсерін саралаған 80-дей ғылыми еңбектері жарық көрген. Оның ізденістерінде Қазақстан аумағындағы байырғы отырықшылық мәдениеттің түрлі мәселелері көтерілуде.