Врезия

Вриезия (лат. Vriesea) – бромелиялар тұқымдасына жататын эпифитті әдемі гүлді өсімдік. Отаны Орталық және Оңтүстік Америкамен Антил аралдары. Табиғатта 250-ге жуық түрі белгілі. Отанында табиғатта өскенімен, біздің елде үй жағдайында өсіріледі. Жапырақтарының ұзындығы 50-70 см, ені 5-6 см. Жапырақтары тығыз жанаса орналасып, құмыра пішіндес қуыс құрайды. Қуыс өзегінен тік өскен гүлсидамының басында қызыл-сары масаққа ұқсас керемет әдемі гүлсағағы 4-5 ай бойы тұрады. Гүлсағағына өсіп шыққан гүлі тез арада гүлдеп, түсіп қалады. Гүліне қарағанда ұзақ уақыт әдемі боп тұратын гүлсағағына бола көп өсіреді. Барлық бромелиялар сияқты вриезия да өмірінде бір-ақ рет гүлдейді. Гүлдеп болған соң, солған гүлсағағын гүлсидамымен кесіп алып тастап, құмыра пішіндес әдемі жапырақтарын жаңа топыраққа отырғызу керек. Біраз уақытта жанынан жас өскіндері өсіп шығады. Жас өскіндерін биіктігі аналығының ортан белінен асқан кезде ғана бөліп, жаңа түбекке отырғызады. Одан ертерек бөлсе тамырланып үлгермейді. Жас өскіндеріне дұрыс күтім жасалынса, бір-екі жылда гүлдейді.

Вриезия
Vriesea duvaliana
Ғылыми топтастыруы
Дүниесі: Өсімдіктер (unranked) Дара жарнақтылар (unranked) Commelinids Сабы: Poales Тұқымдасы: Bromeliaceae Кіші тұқымдасы: Tillandsioideae Тегі: Vriesea Lindl.
түрлері
360 түрі белгілі
Синонимдері
Hexalepis Raf. Vrieseida Rojas Acosta Cipuropsis Ule Neovriesia Britton Alcantarea (E.Morren) Harms × Vriecantarea J.R.Grant Werauhia J.R.Grant

Жарығы:

Алакөлеңкеде жақсы өседі. Егер күннің тіке түскен сәулесінен қорғаса, жарық жерде де өсе береді.

Жылуы:

Қысы-жазы жылылықты жақсы көреді. Қыста температура 18 °C-дан төмен болмағаны абзал.

Суғарылуы:

Гүлдеп тұрған мезгілінде құмыраға ұқсас гүл сағағының ішіне тұндырылған су құйып, ішіндегі суды айына бір рет ауыстырып тұру қажет. Ал топырағын аз мөлшерде, дымқылдап қана құяды. Гүлдеп болған соң, тек топырағына ғана су құйып тұру керек.

Ылғалдылығы:

Ылғалды жақсы көреді. Гүлдеп тұрған кезінде гүлін қалқалап барып су бүрку қажет.

Қоректендірілуі:

Көктем және жаз айларында арнайы бромелді гүлдерге арналған тыңайтқышпен қоректендіреді.

Аурулары:

Ауру мен зиянкестерге көп шалдыға бермейді. Дұрыс баптамаған кезде жапырақтары сарғайып, дақтар пайда болып өзгеріске ұшырауы мүмкін. Оның себебі, артық немесе жеткіліксіз суғарылуы, күннің тік түскен сәулелерінің күйдіріп жіберуі және т.с.с..

Көбейтілуі:

Жанама өскіндері арқылы көбейтіледі.

Сілтемелер

• Гүлстан, өсімдіктер туралы сайт Мұрағатталған 20 ақпанның 2012 жылы.

Дереккөздер

"Гүлстан" республикалық ғылыми-танмыдық, көпшілік журнал, 2010 жыл ISSN 2078-6727