Георгина

Георгина, георгин, далия (Нарғызгүл, Dahlia) – күрделі гүлділер тұқымдасына жататын көп жылдық өсімдік. Сабағының биіктігі 35 – 200 см., іші қуыс. Жапырағы тілімденіп, қарама-қарсы орналасқан. Гүл шоғыры – түтікше және тілше немесе тек тілше гүлдерден құралған, түсі алуан түрлі. Оңтүстік және орталық Америкаға тараған 15-ке жуық жабайы түрі белгілі. Қолдан өсірілген 8000-нан астам сорты бар. Бақта өсірілетін Георгинаны күлтесіз, жартылай күлтелі және күлтелі деп үш топқа бөледі. Георгинаны жеке не топтастырып отырғызады және оны ұластыру үшін де пайдаланылады. Оны қаламшадан, тұқымынан және түйнектерін бөлу арқылы көбейтеді. Мұны тыңайтқыш шашалған, қолдан жарық берілетін жерге отырғызады. Ірі гүл шоғырын алу үшін бір түпте үш сабақтан артық қалдыруға болмайды. Гүл егілген жерді қандыра суарады. Топырағын жиі-жиі қопсытады, арам шөбін дер кезінде құртады. Қыста сақтау үшін күзгі бозқыраудан соң түйнегін қазып алады. Кептірген түйнекті құрғақ, қараңғы қоймаға (температурасы 4 – 50 С) сақтайды.

Дереккөздер

Қазақ Энциклопедиясы