Достық қонақ үйі

"Достық" қонақ үйі - 1983 жылы Алматы қаласында салынған қонақ үй. "Қазақтың қала құрылысын жобалау" институтының жобасы (архитектор Ю.Г. Ратушный, В.И. Захаров, конструкторы В.И. Нос) бойынша салынды. Ғимараттың қаңқасы құрама темір-бетон конструкциялы, қабырғалары-кірпіш, ленталы іргетасы - біртұтас темір-бетонды; арқалықтары құрама темір-бетон тақталарынан құралған. Төбесінің пішіні жазық, ішкі суағармен бірлескен, сырты металмен қапталған. Ішкі әрлеуіне түрлі және жасанды жабдықтар қолданған. Вестибюльдің қабырғалары мен едені мәрмәрден, плафондары гипстік элементтерден жасалған. Есік және терезе ойықтары жұқа витраждармен (түрлі-түсті әйнектермен) әшекейленген.