Д.А.Қонаев музей-үйі
Д.А.Қонаев музей-үйі — Алматы қаласы, Төлебаев көшесінің бойында орналасқан және екі бөліктен тұрады: музей-үй және мемориалдық музей-пәтер. Мұндағы музей-үй дегеніміз Д.А.Қонаевтың өмірі мен атқарған істеріне арналған жеке үй. Бұрын бұл композиторлар үйі болған. Музей-үйдің мекен-жайы: Төлебаев көшесі, 117[1].
Қазақстан Респуликасының Президенті Н.Ә.Назарбаевтың 1994 жылдың 24 ақпанында «Дінмұхамед Ахметұлы Қонаев есімін мәңгі қалдыру мақсатында» қаулысы шықты. Онда Қонаевтың Қазақстан алдында сіңірген ерекше еңбегі үшін Алматы қаласында «Д.А.Қонаев музей-үйі» ашылсын делінген.
2001 жылдың қараша айында Алматы қаласының әкімі, мәдениет басқармасы мен Халықаралық Қонаев қоры және оның президенті Э.А. Қонаевтың көмегімен музей ресми түрде ашылды. Музейдің тұңғыш директоры болып Б.З. Батталханов тағайындалды.
2002 жылдың12-қаңтарында Д.А.Қонаевтың 90 жылдық мерейтойында «Д.А.Қонаев музей-үйі» салтанатты түрде ашылды.
Қонаевтың қызметтес әріптестері музейдің ашылуына үлкен үлес қосты. Олар белгілі мемлекет және қоғам қайраткерлері: К.М.Аухадиев, С.С.Жиенбаев, А.А.Кулибаев, Ш.Х.Бекболатов, Ж.А.Асқарова, І.Б.Балтағұлов, С.Ә.Әбдірайымов, А.Д.Ермегияев, Ш.Уалиханов, А.И.Горяйнов, т.б. еді. Музей жәдігерлерін жинауда Д.А.Қонаевтың туысқандары Диар Қонаев пен Бахтияр Серікбаев қол ұшын берді. Бастапқы күндері Заманбек Батталханов ақыл-кеңесін беріп, көмек көрсетті.
2002 жылы музейді 6642 көрермен тамашаласа, қазіргі уақытта олардың саны 18601-ге жеткен. Жәдігерлер саны да жылдан-жылға артып келеді. 2008 жылы оның саны 3030-ға жетті.
Мұражайда Қонаев тұлғасы, оның мемлекетті дамытып-өркендетудегі рөлі мен еңбегі, адамгершілік қасиеттері, өмірінің тұрмыстық жағы көрсетілеген.
Тарихи тұлғаның жұмыс кабинетінің интерьері және басқа да күнделікті өмірде тұтынған заттары Қонаевты тек мемлекет қайреткері ретінде ғана емес, шынайы тұлға ретінде де ашып көрсетеді.Бұл экспозиция үшін өткен ғасырдың 55-60 жылдардағы уақыт шеңбнрі таңдалып алынды. Осы кезең Қонаетың тұлға ретінде және мемлекет қайраткері ретінде қалыптасу жылдары болған еді.
«Дінмұхамед Ахметұлы Қонаев кабинеті» жәдігерлердің толықтай шынайлығымен ерекшеленеді, оны жабдықтау барысында Қонаевтың кабинетінде бірнеше рет болған тұлғаның замандастары мен достарының атынан бағыт-бағдар көрсетіліп, жалпы тигізген көмегі айтарлықтай болды. Жеке тұтынған заттары ретінде: куәліктер, тарихи құжаттар, қаламдар, әшекейлі оттықтардың жиынтығы, қолдан жасалған түрлі пышақтар, сувенирлерді мысалға келтіруге болады. Келушілер осылардың барлығын қолдарымен ұстап көре алады. Бұдан басқа Қонаевтың бюстісі, портреттері, кілемдер де қойылған. Алматының басқа ешбір музейінен мұндай бұйымдарды көру мүмкіндігі жоқ болғандығы, әрине, келушілердің қызығушылығын оятады.
Әсіресе мемориалды музейдегі түпнұсқалар қызығушылықты ерекше арттырады. Біздің музейіміздің экспозициялары толықтай шынайы мемориалдық дүниелерден жинақталған. Сол заманның кабинеттік стилі сақталған. «Қонаев кабинетінде» болған жандар шынайы тарихи әрі уақыттық ортаға түскендей күй кешеді.
Музей кітапханасында Қонаевтың жеке өзінің кітаптары мен қызметтес әріптестерінің кітаптары да бар, олардың жалпы саны 3000 данадан асады. Д.А.Қонаев туралы жазылған 66 кітап топтамасы бар. Музейдегі кітаптар мен қолжазбалардан елімізде Ұлы Отан соғысы басталмай тұрған мамыражай кезеңдегі Қоңырат кенішіндегі жұмысшы-қызметкерледің өсу көрсеткіші, олардың тұрмыс-тіршілігі жайлы да құнды деректері таба аласыз. Музей шеңберінде «Қонаевтану» ғылыми-зерттеу орталығы жұмыс істеп келеді.