Жастар театры (Астана)
Астана Жастар театры — 2007 жылдың 5 шілдеде Астана қаласының әкімдігінің қолдауымен құрылған. Жастар театры Халықаралық және республикалық театр фестивальдерінің жүлдегері.
| Астана жастар театры | |
|---|---|
| |
| Орналасуы |  ҚазақстанАстана |
| Директоры | Ернар Құрбанбекұлы Жұматаев |
| Көркемдік жетекшісі | Нұрқанат Жақыпбай ҚР Еңбек сіңірген қайраткері |
| Бас режиссёрі | Нұрқанат Жақыпбай ҚР Еңбек сіңірген қайраткері |
| Сайты | http://zhastar-theatre.kz |
| Марапаттары | Қазақстан тұңғыш президенті қоры сыйлығы (2012) |
Ғимарат тарихы
өңдеуҒимарат социалистік реализмнің үздік дәстүрлеріне сай үш қабатты кірпіш құрылыс түрінде салынған. Ол 1954 жылы КСРО мәдени дамуының шарықтау шегінде салынған және бастапқыда Теміржолшылар мәдениет сарайы болған. Оның ашылуы 1956 жылы өтті. Көрермендер залы 800 орынға есептелген, ғимаратта 150 орындық шағын зал да бар. Сарайға В.И. Ленин есімі берілді. 1998-2000 жылдары сарай қайта қалпына келтірілді және мұнда К. Байсейітова атындағы Опера және балет театры ашылды. Бұл жерде театр сахнасын сыйдыру үшін орындардың саны 800-ден 360-қа дейін қысқартылды. 2014 жылы Үкіметтің қаулысымен К. Байсейітова атындағы үлттық опера және балет театры жойылды.
Қазіргі кезде ғимарат Астана қаласының әкімдігі қолдауымен 2007 жылы ашылған «Жастар» театрына тиесілі.[1]
Ғимарат Астана қаласының жергілікті маңызы бар тарих және мәдениет ескерткіштерінің мемлекеттік тізіміне енген сәулет өнері ескерткіші.
Театр тарихы
өңдеу- Астана Жастар театры 2007 жылдың 5 шілдеде Астана қаласының әкімдігінің қолдауымен құрылған жастар театры.
- Өнер ордасы өз шымылдығын Шыңғыс Айтматов пен Әбіш Кекілбайұлынің «Шыңғысхан» спектаклімен ашылды. Спектаклдің қоюшы - режиссері Нұрқанат Жақыпбай, инсценировка авторы – Жаныш Құлмамбетов болды.
- Театрдың алғашқы директоры қызыметіне актер, Қазақстанның еңбек сіңірген қайраткері, жастар одағы сыйлығының лауреаты Ғани Құлжанов басқарды.
- Театр актерлерінің 95 пайызы - Т.Жүргенов атындағы Қазақ ұлттық өнер академиясының түлектері. Қазақстан білім беру ісінің үздігі, профессор Нұрқанат Жақыпбайдың шеберханасында тәрбиеленген шәкірттер. Театрдың іргесін қалап, өнердің үлкен даңғылына шыққан бір топ талапкер - Ернар Жұматаев, Әділ Ахметов, Дәурен Серғазин, Жандәулет Батай, Айнұр Рахипова, Азамат Есқұлов, Бақыт Қажыбаев бастаған қыз-жігіттер жасампаз театрдың негізін қалаушылар, жас та болса ұжымның аға буыны саналады.
- 2015 жылдың 1 наурызында театр жаңа ғимаратқа ие болды.
Театр жетістіктері
өңдеу- 2008 жылдың қазан айында өткен Шыңғыс Айтматовтың туғанына 80 толуына орай ұйымдастырылған Қырғызстан Республикасы Бішкек қаласында өткен Халықаралық «АРТ ОРДО» театр фестивалінде Ш.Айтматовтың шығармалары негізінде жасалған «Жан азабы» спектаклі үш бірдей номинация: «Ең үздік спектакль» – Гран-При, «Жоғары деңгейдегі көркемдік шешімі үшін» және «Үздік сазды безендіру» аталымдарында марапатталды. (Қырғызстан 2008).
- 2008 жылы наурыз айында өткен Халықаралық театр күніне орай ұйымдастырылған Астана қалалық театрларының жыл қорытындысына сәйкес, Н.Гогольдің «Ревизоры» жоғары бағаланып, «Ең үздік спектакль» – Гран-При жүлдесіне ие болды. (Астана 2008).
- 2010 жылы Алматы қаласында өткен ІІІ Халықаралық Орталық Азия елдерінің театрлар фестиваліне Шыңғыс Айтматов пен Әбіш Кекілбайұлынің «Шыңғысхан» спектаклімен «Үздік режиссер», «Үздік Шыңғыс хан рөлі» аталымдары бойынша марапатталды (Алматы 2010).
- 2011 жылы Алматы қаласында Қазақстан Республикасының Тәуелсіздігінің 20 жылдығына арналып ұйымдастырылған XIX театрлар фестивалінде «Ең үздік спектакль» – Гран-При иегері атанды. (Алматы 2011).
- 2012 жылы Театр Мәдениет және өнер саласында Қазақстан Республикасы Тұңғыш Президент – Елбасы қоры сыйлығының лауреаты атағы және «Соңғы жылдардағы спектакльдері үшін» белгісімен марапатталды. (Астана 2012).
- 2016 жылы қыркүйек айында Тәуелсіз мемлекеттер достастығының 25 жылдығына орай Белорусь Республикасының Брест қаласында ұйымдастырылған «Белая Вежа» ХХІ халықаралық театрлар фестиваліне Ш.Айтматов пен Ә.Кекілбаевтің «Шыңғысхан» әфсанасымен (қоюшы режиссері – Қазақстанның еңбек сіңірген қайраткері Нұрқанат Жақыпбай) қатысып, «Ең әсерлі қойылым» («За зрелищное воплощение поэтических притч») аталымындағы жүлде иегері атанды. (Беларусь 2016).
- Көптеген республикалық және халықаралық театр фестивалдерінде театр ұжымы белсене қатысады.
Гастрольдік сапарлар
өңдеу- Астана жастар театры гастрольдік сапарларымен Беларусь, Қырғызстан, Қазақстанның барлық облыстары мен аудандарына барған.
- 2009 жылы сәуір, мамыр айларында театр ұжымы 55 күн Алматы облысының 12 ауданы мен 36 елді-мекенінде қойылым қойып, соңғы 10 жылдықта Қазақстан театр тарихында болмаған гастрольдік «рекордты» жаңартты.
Театр басшылары
өңдеу- 2007 жылдан театрдың көркемдік жетекшісі әрі бас режиссері - Қазақстанның еңбек сіңірген қайраткері, профессор Нұрқанат Жақыпбай.
- 2007 - 2013 жылдары театр директоры - актер, жастар одағы сыйлығының лауреаты Ғани Құлжанов.
- 2013 - 2016 жылдары театр директоры - Айболат Жанғалиұлы Сексенбаев.
- 2016 жылдан бастап театр директоры - актер, Ернар Құрбанбекұлы Жұматаев басқарады.
Дереккөздер
өңдеу- ↑ Қазақстанның тарихи-мәдени нысандарының және жаппай зиярат ету орындарының альбомы/ ; ҚР Мәдениет және спорт министрлігі, Қазақ ғылыми-зерттеу мәдениет институты ; [жоба авторы Т. Бекбергенов ; бас ред. А. Р. Хазбулатов]... – Астана : [б. ж.], 2018. - 495 б., суретті; . – Библиогр.: 490 б. . – 100 дана – ISBN 978-9961-23-485-9