Желкен жабдықтары

Желкен жабдықтары — жел энергиясын қабылдап , оны кеме жүргізуге жұмсайтын желкенді жабдықтауға қажет жабдықтар жиынтығы. Ж. ж. жел күшін қабылдайтын желкендерден, желкен орнататын тік және көлбеу діңгектерден (ронгаут), желкенді басқаруға арналған діңгектерден (такелаждан) құралады. Ж. ж-ның тік және қиғаш орнатылған түрлері бар. Тік Ж. ж. пішіні дұрыс трапеция тәрізді келген, жоғ. жиегі түзу ағашқа бекітілген желкендерден құралады (суретті қ.). Тік Ж. ж. өз осінен бұру арқылы басқарылады. Қиғаш Ж. ж. діңгекке көтерілетін, пішіні бұрыс төртбұрыш немесе үшбұрышты қиғаш желкендерден жасалады. Қиғаш желкендер жел бағытына сәйкес алдыңғы жағындағы тік қырынан айналады және олар орнатылған орнына сәйкес аталады. Үлкен теңіз кемелерінде Ж. ж. қиғаш, тік және аралас орналасады.