Жерік ас

"Бір қозы туса, бір түп бетеге артық шығады" дегендегі айтпақ пәлсапасы дүниеге келер әр перзентің өз ырзығы, өз нәпақасы бар дегенді білдіру. Сондықтан мейлі жас келін болсын, кез келген жас келіншек болсын, оның бойынан жаңа өмірдің белгісі байқалса, соны ағайын-туыс қана емес, ауыл-руластары да қуанышты хабар қылып қабылдаған. Ең алдымен абысын-ажын жерік астын бөгенайын білсе, алдымен соны тауып, арнайы мал сойдырып, жерік ас табағын әзірлеп апаратын болған. Әрине, бастан басқа кәделі мүшелерін - асықты жілік, төсті салып, тағы да міндетті түрде ұлтабарды қосқан. Табақтын үстіне болат кездік қойып апаратын болған. Бұл тағы да болат кездіктей өткір, ел қорғаны болатын ұл болсын дегені. "Тоқ болсан да, толарсақтың сіңірін тастама, аш болсан да асықты жілікті мүжіме" дейтін жұртымыз асықты жылтырата тазалап, онымен ойнайтын болашақ иесіне арнап, тығып қоятын болған. Сол сияқты "жолымыз ашық болсын" деп жауырынын "жолын ашып" - ортасындағы жылтыр сүйекті міндетті түрде жарып қаятын ырым бар.