1936 жылы Форт-Шевченко қаласына қарасты Құлалы жарты аралығындағы «Құлалы» колхозында туған. Орта мектептен кейін (1955-1957 ж) Гурьев педагогикалық училищесінің физкультура факультетін, одан кейін оқуын жалғастырып, Гурьев Мемлекеттік педагогикалық институтының филология факультетін бітірген. Еңбек жолын Жданов атындағы орта мектепте мұғалімдіктен бастап, сол мектептің оқу ісінің меңгерушісі болды. 1970-1973 жылдары Ералиев атындағы орта мектептің жанындағы интернаттың меңгерушілігін атқара жүріп, қазақ тілі мен әдебиеті пәнінен сабақ берді. Маңғышлақ облысының құрылғанына байланысты 1973 жылы мұғалімдер білімін жетілдіру институтының кабинет меңгерушілігіне және 1979-1982 жылдары Форт-Шевченко қалалық советінің мәдениет бөлімін басқаруға шақырылды. 1982-1984 жылдары №80 жол құрылыс басқармасы бастығының жабдықтау жөніндегі орынбасары қызметін атқарды. 1982-1986 жылдары жаңадан құрылған Қызылөзен селолық советінің төрағасы болды. 1986 жылдың қазан айынан бастап Халық депутаттары Ақшұқыр селолық советінің төрағасы болып жұмыс жасады. 1992-жылдан зейнеткерлікке шыққанға шейін Маңғыстау облыстық ауыл шаруашылығының тәжірибе станциясында әлеуметтік, кадр, жалпы мәселелер жөніндегі директордың орынбасары болып қызмет атқарды. Оқу-ағарту, мәдениет саласындағы жемісті еңбегі үшін қалалық, облыстық және Оқу министрлігінен Мәдениет Министрлігінің бірнеше рет Құрмет грамоталары беріліп, «Қазақ ССР оқу ісінің үздік қызметкері» белгісімен наградталды. Еңбек ардагері, Социалистік жеңістің жеңімпазы (1975,76,77ж) Сұлтанбай Наубетов Форт-Шевченко қалалық советінің «Халыққа білім беру, мәдениет, тарихи мұраларды қорғау, тіл жөніндегі» тұрақты комиссияның төрағасы және қалалық советтің президиумы мен Қазақстан КП Форт-Шевченко қалалық партия комитетінің мүшесі болып қоғамдық қызмет атқарды. 1980-1991 жылдары ішінде Форт-Шевченко қалалық және Қызылөзен, Ақшұқыр селолық кеңесінің депутаты болды. 1962 жылдан Маңғыстау ауданының «Жаңа Өмір» Гурьев облыстық «Коммунистік еңбек» , Маңғыстау облыстық «Маңғыстау» газеттерінің штаттан тыс тілшісі болды. Қазақстан Республикасы Журналистер Одағының мұшесі. Түпқараған ауданының Құрметті азаматы. 2002 жылы 67 жасқа қараған шағында ауыр науқастан қайтыс болды. Көп жылдар еңбек еткен елді мекеніне, Ақшұқыр селосының жаңадан пайда болған көшесіне 2009 жылы 9 қыркүйекте «Наубетов Сұлтанбай» есімі берілді.
