Жәлел Иманғалиев

Жәлел Иманғалиев
	Жәлел Иманғалиев
Туған күні	10 мамыр 1919
Туған жері	Манаш ауылы, Новобогат ауданы Гурьев облысы
Қайтыс болған күні	10 қазан 1995 (76 жас)
Қайтыс болған жері	Атырау
Азаматтығы	КСРО; Қазақ КСР;
1941-1945 жж. Ұлы Отан соғысындағы Жеңіске 50 жыл мерейтойлық медалі

Жәлел Иманғалиев (10 мамыр 1919 Манаш ауылы, Новобогат ауданы Гурьев облысы – 10 қазан 1995 Атырау) – еңбек және соғыс ардагері. Қазақ КСР Халық ағарту ісінің үздігі.

Өмірбаян

Жәлел Иманғалиев 10 мамыр 1919 жылы Манаш аулында Новобогат ауданы Гурьев облысы кедей шаруаның отбасында дүниеге келді. Руы Беріш, бөлімі Есенғұл, Кіші жүз.

Білімі

Манаш ауылындағы А.А. Андреев атындағы мектепте оқып, 9-10 сыныптарды Сарайшық орта мектебінде үздік бағалармен тәмамдаған. Сол кезеңдегі латын қарпімен жазылған Мақтау Грамотасы әлі күнге дейін сақтаулы.

1948 жылы Гурьев мұғалімдер училищесін бітірген.

1956 жылы Гурьев мұғалімдер институтың бітірген.

1966 жылы Гурьев мемлекеттік педагогикалық институтың қазақ тілі және әдебиеті факультетін бітірген.

Еңбек жолы

1939 жылы Қызыл армия қатарына шақырылып, Забайкалье әскери округінде, Иркутск қаласы маңыңда әскери міндетін өткен.

1941-1945 жылдары Ұлы Отан соғысына қатысып, жаяу әскер қатарында сержант шеніндегі станокты пулеметші болды. Москва түбіндегі Смоленск, Вязьма, Сафроново, Ярцево қалаларын қорғауға және Украина майдандарындағы соғысқа қатысқан.

1946 жылы Кеңес Армиясы қатарынан оралған соң, Исатай (қазіргі Новобогат) ауданының Тұщықұдық ауыл кеңесіндегі Каганович атындағы жеті жылдық мектепте алғашқы әскери дайындық (НВП) пәнінен сабақ беріп, еңбек жолын бастады. Кейін Жанбай ауылындағы К.Маркс атындағы орта мектепте, М.Фрунзе атындағы бастауыш мектепте және “Сарытөбе” жеті жылдық мектебінде мұғалім болып қызмет атқарды.

1955-1957 жылдары Манаш ауылындағы “Ақарал” бастуыш мектебінде меңгеруші.

1957 жылдан 1988 жылдар арасында Балықшы аудандық Дамбы ауылдық кеңесіне қарасты, “Октябрьдің 40 жылдығы” (қазіргі Ф.Оңғарсынова атындағы) орта мектепте үздіксіз енбек етіп, осы мектептен зейнеткерлікке шықты.

Білім алған шәкірттерінің арасында: Қазақстанның Құрметті журналисі – Жүсіп Хисымов, Қазақстан журналистер одағының мүшелері – Қазихан Қабдел, Нури Муфтах, ҚР мәдениет қайраткері, Құрмет орденінің иегері – Мереке Ғұмаров, Қазақстан-Ресей гуманитарлық университетінің 1-ші ректоры – академик Егізбай Сақпанов, белгілі музыкант – Жағыпар Хамитов, Қазақстан журналистер одағы мүшесі – Айдар Сабыров, облысқа белгілі оташы-дәрігер, “Алтын скальпель” орденінің иегері – Қалыбек Қылау және басқа да көптеген азаматтар.

Марапаттары мен атақтары

Ұлы Отан соғысындағы көрсеткен ерлігі үшін «II-дәрежелі Ұлы Отан соғысы» орденімен және 11 медальмен марапатталған ^[1].

Бірнеше рет аудандық, облыстық оқу бөлімінің Құрмет грамоталарымен және облыстық кәсіподақтар федерациясының Құрмет грамотасымен марапатталған.

1985 жылы «Қазақ КСР Халық ағарту ісінің озық қызметкері» деген атаққа ие болды.

Есімі 2004 жылы «Атырау облысы мұғалімдер энциклопедиясы» және 2014 жылы шыққан «Тұщықұдық ауылы шежіресі» кітаптарына енгізілген ^[2].

Атырау облысы Атырау қаласы Атырау ауылдық округі әкімінің 2017 жылғы 28 наурыздағы шешімімен Атырау-1 ауылындағы көшеге " Жәлел Иманғалиевтің" есімі берілді ^[3].

Сілтемелер

Атырау облысы мұғалімдерінің энциклопедиясы. Ақтөбе: А-Полиграфия, 2004. ISBN 9965-691-52-5

Тұщыкұдык ауылы шежіресі, Алматы 2014, 97 бет. ISBN 978-601-7174-37-8

Айбөпе Мұратқызы. "Қызыл балықтың Алтынсарині"/ Атырау, 7 қараша 2024

Дереккөздер

↑ https://pamyat-naroda.su/awards/anniversaries/1515742948 Мұрағатталған 21 қазанның 2020 жылы.
↑ https://atr.kz/zhanalyqtar/rpa-zhadyinda-yi-esim/
↑ https://adilet.zan.kz/kaz/docs/V17TAC03832

[1] ttps://pamyat-naroda.su/awards/anniversaries/1515742948 Мұрағатталған 21 қазанның 2020 жылы.

[2] ttps://atr.kz/zhanalyqtar/rpa-zhadyinda-yi-esim/

[3] ttps://adilet.zan.kz/kaz/docs/V17TAC03832

[1]

[2]

[3]