Зәбира Қыдырәліқызы Жұбатова

Зәбира Қыдырәліқызы Жұбатова (8.3.1914, Петропавл - 31.8. 1999, Қарағанды) - әнші, Қазақстанның халық артисі (1945). Зәбира Қыдырәліқызы Жұбатова (1914-1999ж.ж.)

Зәбира Жұбатова 1932-жылы он сегіз жасқа толар-толмас шағында Қарағанды радиокомитетіне әнші болып орналасады. Мұнда ол атақты әншілер Қали Байжанов, Қосымжан Бабақовтармен қызметтес болып, әнші ағаларынан өнердің қыр-сырын үйренеді. Сол жылдары радиокомитетінің жанынан Қазақстандағы тұңғыш көп дауысты қазақ хоры ашылады. Хордың жетекшісі Борис Александрович Орлов, концертмейстері Валентина Сергеевна Пирогова еді. Зәбира хорға қатыса жүріп жеке ән де айтады. Хор үлкен жетістіктерге жетіп, Мәскеуге барып, өнер көрсетіп қайтады. 1936 жылғы алғашқы сапарларында хордың және оның құрамындағы әншілердің атағы шығып, мәртебелері көтеріліп қайтады. Осы сапарда Зәбира Жұбатова жеке дауыста «Екі жиренді» орындап жұрттың қошаметіне бөленеді. Бұл жөнінде «Народное творчество» журналының 1937 жылғы №1 санында профессор В.М.Беляев ерекше ілтипатпен жазады. 1938-жылғы Мәскеуге екінші рет барған кездерінде хор да Зәбира да жаңа бағдарламамен барған болатын. Концертті тыңдаған Бүкілодақтық радиокомитеті хорларының инспекторы Демьянов және музыка зерттеушісі, профессор В.М.Беляев ұжымның 1936 жылға қарағанда әжептеуір өскенін тілге тиек етеді. Осы жылы Зәбира Жұбатова Қазақ ССР-ның еңбек сіңірген артисі атағын алады. 1941 жылы Зәбираны Алматыдағы Мемлекеттік опера және балет театрына әнші ретінде қабылдайды. Алайда, жұбайының денсаулығына байланысты ол бұл ұсыныстан бас тартқан. Сұрапыл соғыс жылдарында Зәбира обылыстық филармонияда әншілік қызметте болатын. Бір мезгіл майдан даласына барып, жауынгерлер алдында өнер көрсетіп, олардың жігеріне жігер қосып, кеуделеріне сенім отын жандыра білді. 1945 жылдың 17- ақпанында оған Қазақ ССР-ның халық артисі деген атақ беріледі. З.Жұбатова 1969 жылы зейнет демалысына шығады. Оған республикалық дәрежедегі дербес зейнеткер мәртебесі беріледі. Зәбира Жұбатова 1999 жылдың 31 шілдесінде дүниеден озған.

Дереккөздер өңдеу