Игита

Леонардо де Мело Виейра Лейте (порт. Leonardo De Melo Vieira Leite; 6 маусым 1986 жыл, Рио-де-Жанейро, Бразилия), қысқаша Игита (порт.Higuita) атымен танымал - қазақстандық футзал ойыншысы, «Қайрат» клубының қақпашысы, футзалдан Қазақстан ұлттық құрамасының капитаны. Үш мәрте әлемнің ең үздік қақпашысы атанған. Футзал қақпашыларының арасында аяқпен ойнап, шабуылға араласу дәстүрін тұңғыш енгізген ойыншы.

Игита
Жалпы мағлұмат
Толық аты	Леонардо де Мело Виейра Лейте
Лақап аттары	Игита
Туған күні	6 маусым 1986 (1986-06-06) (38 жас)
Туған жері	Рио-де-Жанейро, Бразилия
Азаматтығы	Бразилия Қазақстан
Бойы	180см
Салмағы	83кг
Позиция	қақпашы
Клуб жайлы ақпарат
Номері	2
Клуб карьерасы 2006—2008 Кабу-Фриу 2009 Васко да Гама 2009—2010 Тұлпар 2011 Белененсиш 2011— Қайрат Ұлттық құрамы 2013— Қазақстан

Өмірбаяны

Футболды бес жасынан бастап ойнады. «Васку да Гама», «Фламенго» және «Флуминенсе» клубтарына ойнады. Ұзын шашына қарай әйгілі колумбиялық қақпашы Рене Игитаға ұқсағандықтан "Игита" деп кеткен. Мадридтік Реал командасына ойнаған Марсело Вейра екеуі бала кезден дос.

18 жасына дейін футболды мини-футболмен параллель ойнады. 2009 жылы қарағандылық Тұлпар (футзал клубы)қақпашы ретінде шақыру алады. Қарағандыда бір маусым ойнағаннан кейін Португалия кетеді.

2011 жылдан бастап алматылық Қайрат футзал клубының ойыншысы. Қазақстанда 5 жыл тұрғаннан кейін Қазақстан азаматтығын алуға шешім қабылдайды. Қазақстанмен қатар Бразилия құрамасына да шақыру түседі. Ал 2013 жылдан бастап футзалдан Қазақстан ұлттық құрамасының ойыншысы боп келеді. Игитаның жолдасы Джулиана, қызы Клара. Қазақстанның еңбек сіңірген спорт шебері атағына ие болады.

Игита 2024 жылы өтетін футзалдан Әлем Чемпионатының іріктеуінен өтіп, әлемдік додаға қатысу ұлттық құрамадағы шешуші жарыс болатындығын хабарлаған еді. Қайрат футзал командасымен де контракт 2024 жылға дейін

Жетістіктері

• Қазақстанның чемпионы (4) : 2011/12, 2012/13, 2013/14, 2014/15.
• Қазақстанның чемпионатының күміс жүлдегері : 2010.
• Қазақстанның кубогының иеленушісі (5) : 2010, 2012, 2013, 2014, 2015.
• Қазақстанның суперкубоғының иеленушісі (2) : 2012, 2014.
• УЕФА кубогының иеленушісі (2) : 2013, 2015.
• Әлем суперкубоғының иеленушісі : 2014.
• Әлем суперкубоғының күміс жүлдегері : 2015.
• Еременко кубоғының иеленушісі : 2014.
• Еременко кубоғының қола жүлдегері : 2015
• "Tashkent Cup" турнирының жеңімпазы (4) : 2014
• Қазақстанның чемпионатының алды қақпашысы: 2009/10.
• Қазақстанның кубогының алды қақпашысы (3) : 2010, 2012, 2013.

Игита дауы

2024 жылғы 9 маусым күні Алматыда өткен «Қайрат» пен «Семей» арасындағы Қазақстан чемпионатының финалдық сериясының екінші матчы аяқталғаннан кейін «Қайрат» жанкүйерлері клубтың автобусына дейінгі жолды басқа командалардың шарфтары мен жалауларымен төсеп қойған болатын. Алғашында назар аудармаған Лео Игита сол атрибутикадан тапап өтіп, кейін жанкүйерлердің өтініші бойынша қарсыластардың шарфтарында билеген Лео Игитаның видеосы әлеуметтік желіде тарай бастады.

Игитаның бұл әрекеті жанкүйерлердің ызасын оятып, ұлттық құрамадан аластату және қазақстандық азаматтығын кері алу туралы пікірлері айтыла бастады. Наразылық пікір білдіргендер арасында басқа клубтардың ойыншалыра мен футболдан Қазақстан ұлттық құрамасының ойыншылары да бар. Лео Игита сол күні арнайы видео түсіріп, чемпионаттың басқа қатысушылары мен спорт қауымдастығынан кешірім сұрады, өзінің іс-әрекетінің салдарын видеоны көргенге дейін түсінбегенін айтты. «Қайрат» футзал клубы да «Ақтөбе» мен «Астана» футбол клубтарынан да ресми түрде кешірім сұрады:

"Қайырлы кеш баршаңызға! Егер "Ақтөбе" және "Астана" жанкүйерлерінің көңілін қалдырсам, кешірім сұраймын. Шынымды айтсам, олар не туралы сұрап жатқанын толық түсінбедім. Бұл қате көптеген жанкүйерлерді және мені де ренжітті, осыған қатты өкініп тұрмын. "Ақтөбе" және "Астана", сіздердің шарфтарыңызда суретке түскенім үшін кешіріңіздер. Бұл менің шынайы ниетім болған жоқ. Барлығы өте тез болды, тек видеоны көргеннен кейін ғана бұл "Ақтөбе" және "Астана" шарфтары екенін түсіндім. Екі қалада да маған әрқашан жақсы қарады, және менде оларға қарсы жаман ниет болмады. Мен Қазақстан футзалын жақсы көремін және біздің елімізде осы спорт түрінің дамып жатқанына мақтанамын. Әсіресе, "Ақтөбе" бұл дамуда маңызды рөл атқарады, және мен актөбеліктерге футзалға деген қызығушылықтары мен құмарлықтары үшін ризамын. Кешірім сұраймын, баршаңызға үлкен құрметпен қараймын!"

Қайрат футзал клубының бас директоры Әсем Кужанова болған оқиғаға өкініш білдіріп, Игитаның кешірім сұрағанын айтты. Сонымен қатар, бұл әрекет Қайрат футзал клубының жакүйерлері жасамағынан, «Қайрат» футбол клубының ультрас фанаттарының ісі екенін атап өтті.

Қазақстан футзал қауымдастығы (АФҚ) мен Қазақстан футбол федерациясы (ҚФФ) ресми мәлімдемелер жасап, Игитаның әрекетін айыптап, мұндай оқиғаларға жол берілмейтінін айтты. Тәртіптік тексеру нәтижесінде АФҚ «Қайратқа» 500 АЕК (шамамен 1 миллион 846 мың теңге) мөлшерінде айыппұл салынды, ал АФҚ «Қайрат» бас директорына тәртіптік ескерту жасалды.

«Қайрат» футзал клубына инцидентті бастаған адамдарды анықтап, олармен түсіндіру жұмыстарын жүргізу міндеттелді, болашақта осындай жағдайларға жол бермеу міндеттелді. Барлық жағдайларға қарамастан, Лео Игита команда құрамында қала береді, ал клуб пен федерация ойыншылар мен жанкүйерлер арасында жоғары этика мен кәсіпқойлық деңгейін сақтауға жұмыс істейді.

Қазақстан футбол федерациясының (ҚФФ) баспасөз қызметі де Лео Игитаға қатысты жағдай туралы ресми мәлімдеме жариялады: "Қазақстан футбол федерациясы ұлттық құраманың капитаны және АФК «Қайрат» ойыншысы Лео Игита және алматылық клубтың басқа ойыншылары қатысқан оқиғаға қатысты жағдайды ұйымның тиісті заңды органы қарайтынын мәлімдейді. Федерация мұндай әрекеттерді қабылдауға болмайды деп есептейді және ойыншылар арасында жоғары деңгейдегі этика мен кәсіпқойлықты сақтау үшін барлық күш-жігерін жұмсайды, сондай-ақ жанкүйерлер арасында осындай жағдайларды болдырмауға тырысады. Барлық жағдайлар зерттеліп, тиісті шаралар қабылданатын болады".