Иммерсиялық жүйе

Иммерсиялық жүйе (лат. immersio – батыру) – нәрсе мен бірінші линзаның арасы иммерсиялық сұйықтықпен толтырылған оптикалық жүйе. Ол микроскопта қолданылады. Иммерсиялық сұйықтық ретінде кедр майы не минерал май, глицериннің судағы ерітіндісі, вазелин майы, иодты метилен пайдаланылады. Иммерсиялық жүйені есептеу кезінде иммерсиялық сұйықтықтың оптикалық сипаттамалары (сыну көрсеткіші және дисперсия) ескеріледі. Сондықтан жүйе үшін есептелген сұйықтықты ғана қолдану қажет. Иммерсиялық жүйені пайдалану объективтің апературасын (А) үлкейтеді және микроскоптың ажыратқыштық шамасы да жоғарылайды. Иммерсиялық жүйе иммерсиялық сұйықтықтың әр түрлі тереңдігіндегі нысандарды сұйықтыққа объективті батыра отырып зерттеуге мүмкіндік береді.