Инженерлік жұмыстар

Инженерлік жұмыстар (Инженерные работы) — инженерлік бөлімдер жергілікті жерді қорғаныс үшін жабдықтау кезінде, өткелдер құрылысын тұрғызуда орындайтын және басқа да, негізінен, арнайы дайындықты, білім мен дағдыны талап ететін жұмыстар.

Инженерлік жұмыстарды механикаландыру

Инженерлік жұмыстарды механикаландыру (Механизация инженерных работ) — қорғаныс құрылыстарын салу процесінде саперлік әскер құрамындағы жұмыс жасайтындар санын азайтуға және құрылысты қысқа мерзімде бітіруге ықпал ететін әр түрлі механизмдерді қолдану.

Инженерлік жұмыстардың кезектілігі

Инженерлік жұмыстардың кезектілігі (Очередность инженерных работ) — әскерлердің белгілі бір аймақты инженерлік құралдармен жабдықтау кезектілігі. Қарсыластармен тікелей қақтығысу жағдайында бөлімшелердің тірек пункттерін жабдықтау окоп қазудан басталып, одан соң окоптар бөлімдерге бөлінеді, олар ор арқылы бір-бірімен жалғасып, байланыс жолдары қазылады. Ал қарсыластармен тікелей түйісу болмаған жағдайда тірек пункттері мен позицияларды жабдықтаудың инженерлік жұмыстары ор қазудан басталады. Инженерлік жұмыстардың кезектілігі әскердің ұрысқа әр кезде дайын болуын, окоптардың, орлар мен байланыс жолдарының инженерлік жабдыктардың жөндемділігін, жаппай қырып-жоятын қарулардан қорғану орындарының жетілдірілуін көздейді.