Капилавасту

Капилавасту - (пали: Kapilavatthu; хинди कपिलवस्तु) Будданың туған қаласы. Лумбини елді мекенінен шамамен 25 шақырым қашықтықтағы Шакья патшалығына қарасты аудан. Будда 29 жасқа жеткенше осы қалада, сән-салтанат пен молшылықта өмір сүріп, ешқандай қайғы-қасірет дегенді білмей өскен екен. Кейінірек ауру-сырқау, кәрілік және өлім сияқты бақытсыздықтардың бар екенін білген Будда рухани кемелдікке жетуді алдына мақсат етіп, туған қаласын тастап сапар шегеді.

Арада бірнеше жыл өткен соң, аңсаған өміріне қол жеткізген Будда әкесінің шақыртуымен Капилавастуға келеді. Буддаға ерген 500 жас жігіт сопылыққа ден қояды. Дегенмен Вайдрака патша Будданың тұсында Капилавастуда ойран салып, Шакья әулетін қырғынға ушыратады. Осы шабуылдан кейін Капилавасту қаласының орнын орман басып, тіпті XXI ғасырға дейін ол жаққа тек пілмен ғана бара алатындай жағдайда болған.

Будданың туған жерін іздеу жұмыстары XIX ғасырдың соңына қарай басталды. Үндістанның археологиялық басқармасы Капилавасту қаласының орнын Уттар-Прадеш штатының Сиддхартхнагер ауданына қарасты Пипрахава ауылының маңынан тапқан. Тарихи деректерге сай, Будда б.з.д. IV гасырда Капилеастуда дүниеге келген деп есептеледі Бұл жерде Будда жерленгенін Пипрахвадан табылған ежелгі Брахми жазбалары да нақтылайды.

Бугінде Капилавасту - Үндістандағы буддистер мінәжат ететін киелі орын. Бұл жерде буддистер ерекше қасиет тұтатын құндылықтар мен бірнеше ступа орналасқан. Мұндағы үлкен ступаның ішінен Будда жерленген табыт табылған. Капилавасту бірнеше ауылдардан тұрады, олардың арасындаеы ең негізгілері - Пипрахава және Ганвариа.