Каскортранссервис

«Каскортранссервис» – «Каскор» компаниясы құрамындағы акционерлік қоғам. Іргесі 1961 ж. құрылған. 1964 ж. Каспий маңы кен-металлургия комбинаты құрамындағы шағын темір жолы цехы болды. 1980 ж. «Каспий темір жол көлігі кешені» өндірістік бірлестігіндегі темір жол көлігі басқармасы болып қайта құрылды. Қазіргі таңда «Каскортранссервис» АҚ қуатты, техникалық тұрғысынан жабдықталған, мыңдаған жүк жіберушілер мен жүк алушыларға қызмет көрсететін темір жолы көлігі мекемесі саналады. Ол ҚР «ҚТЖ» ҰК темір жолы магистралі мен Ақтау халықаралық теңіз сауда портының негізгі тоғыстырушы, байланыстырушы буыны болып табылады. Бұл кешенді мекеме Ақтау – Ноушарх (Иран), Ақтау – Бақы (Әзірбайжан) және Ақтау – Оля (Ресей) халықаралық паромдық қатынастардың маршрутын байланыстырады. Кәсіпорынның темір жолы көлігімен 2 млн. м2-ден астам қиыршық қоспалары, шағылтас және т.б. құрылыс материалдары жеткізілді. Жүк тасымалдау қызметінің металл, мұнай өнімдері, астық, тұрмыстық пайдалану тауарлары, т.б. жүктердің табиғи түрлері 2000 – 2006 жылдар аралығында 37,5 млн. т-дан асып, 3 есеге өсті. 550 адам жұмыс істейді. Кәсіпорынның алғашқы бастығы В.Н. Щетинин болды (1980 – 1992). Кейінгі басшылары: Г.М. Исаков, В.Титухин, Ю.Д. Проконенко. 1997 жылдан кәсіпорынды В.Гедз басқарып келеді.