Кеспелеуіш машина

Кеспелеуіш машина – иленген қамырды қажетті пішінге келтіріп, жұқалап созып әрі кесіп шығаратын машина. Кеспелеуіш машинаның көлемі шағын, еңбек өнімділігі жоғары, сағатына 500 кг кеспе кесіп шығарады. Машинаның жоғарғы жағында қамырды жұмырлап, созып отыратын арнаулы тетік бар. Осы тетіктегі резеңке білік көмегімен жұқартылған қамыр 4 пышақты айналмалы білік арқылы өтеді де, кеспе болып кесіле береді. Кеспе арнаулы ГОСТ бойынша шығарылады, ұзындығы 300-650 мм, ал қалыңдығы әрқалай. Оқтау білік пен пышақты біліктің ұзындықтары әркелкі, ал жуандығы бірдей болады. Кеспе қалыңдығы біліктердің жақын не қашық орнатылуына байланысты.