Күңгіртөбе І, ІІ

Күңгіртөбе І, ІІ – бекіністі мекенжай орны. Жамбыл облысы Жамбыл ауданы Тамды ауылының батыс және Солтүстік-батыс жағында 1–1,5 км жерде орналасқан. 1941 жылы Жамбыл археология пунктінің экспедициясы (жетекшісі Г.И.Пацевич) зерттеген. Күңгіртөбе І-дің биіктігі 1 м, аумағы 700х350 м ұзынша төбешік, бұрыштарында мұнараларының негізі сақталған. Күңгіртөбе ІІ солтүстіктен оңтүстікке қарай ұзынынан жатқан сопақша төбе. Биіктігі 4 м, аумағы 82х65 м. Қаланың іргесінен өткен Тамды өзенініңескі арнасы сақталған. Зерттеу барысында құм, көзе, құты, қазан, кесе, тостаған, саптыаяқ, қақпақ, шырақ, таба, тұғыр сынықтары табылды. Күңгіртөбе І, ІІ тұрғындары дәнді дақылдар өсіріп, егіншілікпен айналысқан. Су құбырларының қалдықтары, күл-қоқыс тастауға арналған шұңқырлар, бадыраптар, қойма, қамба орындары байқалады. Қала тұрғындары шамамен 7–11 ғ-ларда өмір сүрген. Мал шаруашылығымен де айналысқан.